அமெரிக்க ஓபன் டென்னிஸ் தொடரில் ஸ்பெயினின் கார்லோஸ் அல்கராஸ் கால் இறுதி சுற்றுக்கு முன்னேறினார்.
அமெரிக்காவின் நியூயார்க் நகரில் நடைபெற்று வரும் இந்தத் தொடரின் 8-வது நாளான நேற்று முன்தினம் ஆடவர் ஒற்றையர் பிரிவு 4-வது சுற்று ஆட்டத்தில் 2-ம் நிலை வீரரும் நடப்பு சாம்பியனுமான ஸ்பெயினின் கார்லோஸ் அல்கராஸ், 20-ம் நிலை வீரரான அமெரிக்காவின் டாமி பாலை வீழ்த்தி கால் இறுதி சுற்றுக்கு முன்னேறினார்.
7-ம் நிலை வீரரான ரஷ்யாவின் டேனியல் மேத்வதேவ், 11-ம் நிலை வீரரான அமெரிக்காவின் பிரான்செஸ் தியாபோவை எதிர்த்து விளையாடினார். இதில் டேனியல் மேத்வதேவை 7-6 (7-1), 6-4, 7-6 (8-6) என்ற செட் கணக்கில் வீழ்த்தி கால் இறுதி சுற்றில் நுழைந்தார் பிரான்செஸ் தியாபோ.
8-ம் நிலை வீரரான அமெரிக்காவின் பென் ஷெல்டன் 6-2, 6-3, 6-4 என்ற செட் கணக்கில் 53-ம் நிலை வீரரான கிரீஸின் ஸ்டெஃபானோஸ் சிட்சிபாஸை வீழ்த்தி கால் இறுதி சுற்றுக்கு முன்னேறினார். அதேவேளையில் 27-ம் நிலை வீரரான அர்ஜெண்டினாவின் தோமாஸ் எசட்செவெரி 6-7 (6-8), 4-6, 4-6 என்ற செட் கணக்கில் 46-ம் நிலை வீரரான அமெரிக்காவின் அலெக்ஸ் மைக்கேல்சனிடம் வீழ்ந்தார்.
மகளிர் ஒற்றையர் பிரிவு 4-வது சுற்றில் முதல் நிலை வீராங்கனையும் நடப்பு சாம்பியனுமான பெலாரஸின் அரினா சபலென்கா 6-4, 6-3 என்ற செட் கணக்கில் அமெரிக்காவின் டெய்லர் டவுன்சென்டை வீழ்த்தி கால் இறுதி சுற்றில் கால் பதித்தார். 6-ம் நிலை வீராங்கனையான செக் குடியரசின் லின்டா நோஸ்கோவா 7-5, 5-7, 6-4 என்ற செட் கணக்கில் 11-ம் நிலை வீராங்கனையான உக்ரைனின் மார்தா கோஸ்ட்யுக்கை வீழ்த்தி கால் இறுதி சுற்றில் நுழைந்தார்.
3-ம் நிலை வீராங்கனையான அமெரிக்காவின் ஜெசிகா பெகுலா 6-3, 6-4 என்ற செட் கணக்கில் 16-ம் நிலை வீராங்கனையான ருமேனியாவின் சொர்னா கிறிஸ்டியாவையும், 26-ம் நிலை வீராங்கனையான அமெரிக்காவின் எம்மா நவர்ரோ 6-4, 6-2 என்ற செட் கணக்கில் 21-ம் நிலை வீராங்கனையான ரஷ்யாவின் அனா கலின்ஸ்கயாவையும் வீழ்த்தி கால் இறுதி சுற்றுக்கு முன்னேறினர்.
ஸ்ரீராம் பாலாஜி ஜோடி தோல்வி
ஆடவருக்கான இரட்டையர் பிரிவு 2-வது சுற்றில் இந்தியாவின் ஸ்ரீராம் பாலாஜி, அமெரிக்காவின் இவான் கிங் ஜோடி 4-6, 5-7 என்ற செட் கணக்கில் போட்டித் தரவரிசையில் 12-வது இடத்தில் உள்ள பிரான்ஸின் எட்வர்ட் ரோஜர் வாசலின், மோனாக்கோவின் ஹியூகோ நிஸ் ஜோடியிடம் தோல்வி அடைந்தது.
