ஆசிய பாரா விளையாட்டு போட்டியில் நேற்று ஒரே நாளில் இந்தியா 5 தங்கம், 11 வெள்ளி, 16 வெண்கலம் வென்றது. இதனால் பதக்க பட்டியலில் 5-வது இடத்துக்கு முன்னேறியது.
5-வது ஆசிய பாரா விளையாட்டு போட்டி ஜப்பானின் ஐச்சி-நகோயா மாகாணத்தில் நடைபெற்று வருகிறது. இதன் 3-வது நாளான நேற்று ஆடவருக்கான 100 மீட்டர் ஓட்டத்தில் டி46/47 பிரிவில் இந்தியாவின் திலீப் காவித் பந்தய தூரத்தை 10.69 விநாடிகளில் கடந்து முதலிடம் பிடித்து தங்கப் பதக்கம் வென்றார். மற்றொரு இந்திய வீரரான முகமது மோர்சிங்கனகத் பசில் (10.72) வெள்ளிப் பதக்கம் கைப்பற்றினார்.
ஆடவருக்கான 100 மீட்டர் டி 64 பிரிவில் இந்தியாவின் பிரணவ் தேசாய் (11.96) வெள்ளிப் பதக்கம் கைப்பற்றினார். மகளிருக்கான 100 மீட்டர் ஓட்டத்தில் டி 12 பிரிவில் இந்தியாவின் சிம்ரன் சர்மா பந்தய தூரத்தை 12.02 விநாடிகளில் கடந்து புதிய சாதனையுடன் தங்கப் பதக்கம் வென்றார். நடப்பு தொடரில் சிம்ரன் வெல்லும் 2-வது தங்கப் பதக்கம் இதுவாகும். நேற்று முன்தினம் 200 மீட்டர் ஓட்டத்திலும் அவர், தங்கம் வென்றிருந்தார்.
ஆடவருக்கான உயரம் தாண்டுதலில் டி 44/64 பிரிவில் இந்தியாவின் பிரவீன் குமார் 2.05 மீட்டர் உயரம் தாண்டி தங்கப் பதக்கம் வென்றார். மற்றொரு இந்திய வீரரான பண்டி (1.92) வெள்ளிப் பதக்கம் கைப்பற்றினார்.
ஆடவருக்கான குண்டு எறிதலில் எஃப் 46 பிரிவில் இந்தியாவின் சச்சின் சர்ஜேராவ் கிலாடி 15.87 மீட்டர் தூரம் எறிந்து தங்கப் பதக்கம் வென்றார். மற்றொரு இந்திய வீரரான முகமது யாசர் (15.06) வெள்ளிப் பதக்கம் கைப்பற்றினார். ஆடவருக்கான குண்டு எறிதலில் எஃப் 53 பிரிவில் இந்தியாவின் ஆயுஷ் வர்மா 8.16 மீட்டர் தூரம் எறிந்து முதலிடம் பிடித்து தங்கப் பதக்கம் வென்றார்.
கஸ்தூரி ராஜாமணி
மகளிருக்கான பவர்லிஃப்டிங்கில் 67 கிலோ எடைப் பிரிவில் இந்தியாவின் கஸ்தூரி ராஜாமணி 108 கிலோ எடையை தூக்கி 2-வது இடம் பிடித்து வெள்ளிப் பதக்கம் வென்றார். உஸ்பெகிஸ்தானின் ருக் ஷோனா உக்தமோவா (127 கிலோ) தங்கம் வென்றார். கஸ்தூரி ராஜாமணி தமிழகத்தை சேர்ந்தவர் ஆவார்.
பிரீத்ரி பால் (மகளிருக்கான 100 மீட்டர் ஓட்டத்தில் டி 35 பிரிவு) வெள்ளிப் பதக்கம் வென்றார். மகளிருக்கான குண்டு எறிதலில் எஃப் 34 பிரிவில் இந்தியாவின் பாக்ய ஜாதவ் வெள்ளிப் பதக்கம் கைப்பற்றினார். அனுபவ் சவுத்ரி (ஆடவர் 100 மீட்டர் ஓட்டம் டி 35 பிரிவு), பர்வீன் (ஆடவருக்கான குண்டு எறிதல் எஃப் 46 பிரிவு), ராகேஷ்பாய் பாத் (ஆடவருக்கான 100 மீட்டர் ஓட்டம் டி 37 பிரிவு) ஆகியோர் வெண்கலப் பதக்கம் கைப்பற்றினர்.
பாட்மிண்டனில் ஆடவருக்கான இரட்டையர் பிரிவில் இந்தியாவின் கிருஷ்ணா நாகர், சிவராஜன் சோலைமலை ஜோடி 2-வது இடம் பிடித்து வெள்ளிப் பதக்கம் வென்றது. இதில் சிவராஜன் சோலைமலை தமிழகத்தை சேர்ந்தவர் ஆவார்.
வில்வித்தையில் மகளிருக்கான காம்பவுண்ட் அணிகள் பிரிவில் ஷீத்தல் தேவி, பாயல் நாக் ஜோடி இறுதிப் போட்டியில் சீன ஜோடியிடம் தோல்வி அடைந்து வெள்ளிப் பதக்கம் வென்றது.
ஆடவருக்கான நீச்சலில் 100 மீட்டர் பேக்ஸ்டிரோக் எஸ் 13 பிரிவில் இந்தியாவின் ரவி கார்த்திக் புதிகினா (1:10.10) வெள்ளிப் பதக்கம் வென்றார். எஸ்பி 13 பிரிவில் இந்தியாவின் ஹிமான்ஷு நந்தால் (1:20.72) வெள்ளிப் பதக்கம் கைப்பற்றினார்.
நேற்று மட்டும் இந்தியா 5 தங்கம், 11 வெள்ளி, 16 வெண்கலம் வென்றது. இதன் மூலம் பதக்க பட்டியலில் இந்தியா 14 தங்கம், 22 வெள்ளி, 26 வெண்கலம் என 62 பதக்கங்களை வென்று 5-வது இடத்துக்கு முன்னேறியது.
