அமெரிக்க ஓபன் டென்னிஸ் தொடரில் முதல் நிலை வீரரான ஜெர்மனியின் அலெக்ஸாண்டர் ஜிவேரேவ், 2-ம் நிலை வீராங்கனையான கஜகஸ்தானின் எலெனா ரைபகினா உள்ளிட்டோர் கால் இறுதி சுற்றுக்கு முன்னேறினர்.
அமெரிக்காவின் நியூயார்க் நகரில் நடைபெற்று வரும் இந்தத் தொடரின் 9-வது நாளான நேற்று முன்தினம் ஆடவர் ஒற்றையர் பிரிவு 4-வது சுற்றில் முதல் நிலை வீரரான ஜெர்மனியின் அலெக்ஸாண்டர் ஜிவேரேவ், 21-ம் நிலை வீரரான இத்தாலியின் லுச்சியானோ டார்டெரியை எதிர்த்து விளையாடினார். இதில் ஜிவேரேவ் 6-2, 6-2, 7-6 (7-3) என்ற செட் கணக்கில் வெற்றி பெற்று கால் இறுதி சுற்றுக்கு முன்னேறினார்.
70-ம் நிலை வீரரான நெதர்லாந்தின் போடிக் வான் டி ஜாண்ட்ஷல்ப், 87-ம் நிலை வீரரான பிரான்ஸின் ஆர்தர் கியாவை எதிர்த்து விளையானார். சுமார் 5 மணி நேரம் 13 நிமிடங்கள் நடைபெற்ற இந்த போராட்டத்தில் போடிக் வான் டி ஜாண்ட்ஷல் 3-6, 6-7 (0-7), 7-6 (9-7), 7-6 (7-3), 6-4 என்ற செட் கணக்கில் வெற்றி பெற்று கால் இறுதி சுற்றில் கால்பதித்தார். அமெரிக்க ஓபன் வரலாற்றில் நீண்ட நேரம் நடைபெற்ற 4-வது ஆட்டமாக இது அமைந்தது.
2022-ம் ஆண்டு 2-வது இடத்தைப் பிடித்த நார்வேயின் காஸ்பர் ரூட் முதுகுவலியால் கடைசி நேரத்தில் போட்டியில் இருந்து விலகியிருந்தார். இதனால் அவரது இடத்துக்கு தகுதி சுற்றின் இறுதி சுற்றில் தோல்வி அடைந்த (‘லக்கி லூசர்’ – தகுதிச்சுற்றின் இறுதிச் சுற்றில் தோற்று, மற்றொரு வீரர் விலகும்போது பிரதான சுற்றில் நுழையும் வீரர்) பிரான்ஸ் வீரரான ஆர்தர் கியா தேர்வாகி இருந்தார்.
தனக்கு கிடைத்த வாய்ப்பை அவர், சரியாக பயன்படுத்திக் கொண்டு கால் இறுதி சுற்றில் கால்பதித்துள்ளார். இதன் மூலம் கிராண்ட் ஸ்லாம் தொடர்களில் கால் இறுதி சுற்றுக்கு முன்னேறிய முதல் ‘லக்கி லூசர்’ என்ற பெருமையை பெற்றுள்ளார் ஆர்தர் கியா. 50-ம் நிலை வீரரான ரஷ்யாவின் கரேன் கச்சனோவ் 7-5, 4-6, 6-7 (6-8), 6-1, 6-4 என்ற செட் கணக்கில் 14-ம் நிலை வீரரான அமெரிக்காவின் லர்னர் டியனை வீழ்த்தி கால் இறுதி சுற்றுக்கு முன்னேறினார்.
இந்த ஆட்டம் 3 மணி நேரம் 50 நிமிடங்கள் நடைபெற்றது. மற்றொரு ஆட்டத்தில் 28-ம் நிலை வீரரான பெல்ஜியத்தின் அலெக்ஸாண்டர் பிளாக் 6-3, 4-6, 7-5, 7-5 என்ற நேர் செட் கணக்கில் 24-ம் நிலை வீரரான அர்ஜெண்டினாவின் பிரான்சிஸ்கோ செருண்டோலோவை தோற்கடித்து கால் இறுதி சுற்றில் நுழைந்தார். இதன் மூலம் அமெரிக்க ஓபன் வரலாற்றில் கால் இறுதி சுற்றுக்கு முன்னேறிய முதல் பெல்ஜியம் வீரர் என்ற பெருமையை பெற்றார் அலெக்ஸாண்டர் பிளாக்.
மகளிர் ஒற்றையர் பிரிவு 4-வது சுற்றில் 2-ம் நிலை வீராங்கனையான கஜகஸ்தானின் எலெனா ரைபகினா, 13-ம் நிலை வீராங்கனையான ஜப்பானின் நவோமி ஒசாகாவை எதிர்கொண்டார். இதில் ரைபகினா 6-1, 6-4 என்ற நேர் செட் கணக்கில் வெற்றி பெற்று கால் இறுதி சுற்றில் கால் பதித்தார். கால் இறுதி சுற்றில் ரைபகினா, சீனாவின் ஜெங் கின்வென்னுடன் மோதுகிறார். இதில் வெற்றி பெற்று அரை இறுதி சுற்றுக்கு ரைபகினா முன்னேறும் பட்சத்தில் டென்னிஸ் தரவரிசையில் பெலாரஸின் அரினா சபலென்காவை பின்னுக்குத்தள்ளி முதலிடத்தை கைப்பற்ற வாய்ப்பு உள்ளது.
ஒருவேளை ரைபகினா கால் இறுதி சுற்றில் தோல்வி அடைந்தாலும் கூட, சபலென்கா, கோ கோ காஃப் அல்லது ஜெசிகா பெகுலா ஆகியோரில் யாரும் ஒருவர் பட்டத்தை வெல்லவில்லை என்றால், ரைபகினா முதலிடத்துக்கு முன்னேற முடியும். தகுதி நிலை வீராங்கனையான ஜெங் கின்வென் 4-வது சுற்று ஆட்டத்தில் 8-ம் நிலை வீராங்கனையான போலந்தின் இகா ஸ்வியாடெக்கை 7-5, 6-3 என்ற் நேர் செட் கணக்கில் அதிர்ச்சி அளிக்கும் வகையில் தோற்கடித்து கால் இறுதி சுற்றுக்கு முன்னேறினார்.
இதன் மூலம் 2021-ம் ஆண்டுக்கு பின்னர் கால் இறுதி சுற்றுக்கு முன்னேறிய தகுதி நிலை வீராங்கனை என்ற பெருமையை பெற்றார் ஜெங் கின்வென். இதற்கு முன்னர் 2021-ல் இங்கிலாந்தின் எம்மா ரடுகானு தகுதி நிலை வீராங்கனையாக கால் இறுதி சுற்றில் கால்பதித்து இருந்தார். அவர், அந்தத் தொடரில் சாம்பியன் பட்டம் வென்று வரலாற்று சாதனையையும் நிகழ்த்தி இருந்தார்.
5-ம் நிலை வீராங்கனையான ரஷ்யாவின் மிர்ரா ஆண்ட்ரிவா 5-7, 6-4, 6-3 என்ற செட் கணக்கில் 24-ம் நிலை வீராங்கனையான ஆஸ்திரியாவின் அனஸ்டசியா பொட்டபோவாவை வீழ்த்தி கால் இறுதி சுற்றில் நுழைந்தார். கால் இறுதி சுற்றில் மிர்ரா ஆண்ட்ரிவா 4-ம் நிலை வீராங்கனையான அமெரிக்காவின் கோ கோ காஃபுடன் பலப்பரீட்சை நடத்த உள்ளார். கோ கோ காஃப் 4-வது சுற்றில் 6-1, 6-4 என்ற நேர் செட் கணக்கில் சகநாட்டைச் சேர்ந்த இவா ஜோகோவிக்கை தோற்கடித்தார்.
