ஆந்திராவில் காங்கிரஸுக்கு ஒரு கவுன்சிலர்கூட இல்லாத நிலை உருவாகி உள்ளது.
ஒரு கால கட்டத்தில் காங்கிரஸ் கட்சியின் கோட்டையாக ஆந்திரா விளங்கியது. கடந்த 1982-ல் என்.டி.ராமா ராவ், ‘தெலுங்கு தேசம்’ தொடங்கி ஆட்சியைப் பிடித்தார். இதன் பிறகு ஒருங்கிணைந்த ஆந்திராவில் தெலுங்கு தேசமும், காங்கிரஸும் மாறி, மாறி ஆட்சி அமைத்து வந்தன.
இந்த சூழலில் ஆந்திராவில் இருந்து தெலங்கானா மாநிலத்தை உருவாக்கக் கோரி தொடர் போராட்டங்கள் நடைபெற்றன. கடந்த 2014-ம் ஆண்டு ஜூன் 2-ம் தேதி நாட்டின் 29-வது மாநிலமாக தெலங்கானா உதயமானது. ஆந்திரா, தெலங்கானாவுக்கு 10 ஆண்டுகள் ஹைதராபாத் பொது தலைநகரமாக இருக்கும். அதன் பிறகு ஹைதராபாத் தெலங்கானாவின் நிரந்தர தலைநகரமாக மாறும் என்று அறிவிக்கப்பட்டது.
அப்போதைய காங்கிரஸ் அரசின் செயலால் ஆந்திராவுக்கு தலைநகரம் இல்லாத சூழல் எழுந்தது. இதன் எதிர்விளைவாக ஆந்திராவில் காங்கிரஸ் முழுமையாக காணாமல் போய்விட்டது. கடந்த 2024-ம் ஆண்டில் நடந்த சட்டப்பேரவைத் தேர்தலில் தெலுங்கு தேசம் வெற்றி பெற்று சந்திரபாபு நாயுடு முதல்வராகப் பதவி வகிக்கிறார்.
தற்போது ஜெகன்மோகன் ரெட்டியின் தங்கை ஒய்.எஸ். சர்மிளா காங்கிரஸ் கட்சியின் மாநில தலைவராகப் பதவி வகித்து வருகிறார். அவர் தலைமையிலான காங்கிரஸ் ஆந்திராவில் அண்மையில் நடைபெற்ற உள்ளாட்சித் தேர்தலில் போட்டியிட்டது.
இதில் காங்கிரஸ் சார்பில் ஒருவர்கூட வெற்றி பெறவில்லை. காங்கிரஸுக்கு ஆந்திராவில் நாடாளுமன்ற உறுப்பினரோ, சட்டப்பேரவை உறுப்பினரோ இல்லை. தற்போது உள்ளாட்சித் தேர்தலிலும் ஒரு கவுன்சிலர்கூட இல்லாத நிலை உருவாகியுள்ளது சமூக வலைதளங்களில் விவாதமாக மாறியிருக்கிறது.
