டாஸ்மாக் ஊழியர்களின் போராட்டத்தை தொடர்ந்து மண்டல வாரியாக மெமோ அனுப்பப்பட்டு வருவதாகவும், 300க்கும் மேற்பட்ட டாஸ்மாக் ஊழியர்கள் சஸ்பெண்ட் செய்யப்பட்டுள்ளதாக தகவல் வெளியாகி உள்ளது.
தமிழ்நாடு முழுவதும் காலி மதுபானப் பாட்டில்களைத் திரும்பப் பெறும் திட்டத்தைச் செயல்படுத்துவதற்கு டாஸ்மாக் ஊழியர்கள் எதிர்ப்புத் தெரிவித்து வருகின்றனர்.
இந்தப் புதிய நடைமுறையை செயல்படுத்துவதால் ஏற்கெனவே உள்ள பணிகளுடன் கூடுதல் சுமை ஏற்படுவதாக ஊழியர்கள் தெரிவிக்கின்றனர். மேலும், காலி மதுபானப் பாட்டில்களைத் திரும்பப் பெறுவதற்குத் தனியாகப் பணியாளர்களை நியமிக்க வேண்டும், பாட்டில்களை சேகரிப்பதற்குத் தனி ஏற்பாடுகளை செய்ய வேண்டும் உள்ளிட்ட கோரிக்கைகளை வலியுறுத்தி வருகின்றனர்.
இதற்கிடையே, தங்களது கோரிக்கைகளை வலியுறுத்தும் வகையில் கடந்த நவ.1ம் தேதி தமிழகம் முழுவதும் பல்வேறு மாவட்டங்களில் டாஸ்மாக் ஊழியர்கள் திடீர் வேலைநிறுத்தத்தில் ஈடுபட்டனர். இதனால் ஏராளமான டாஸ்மாக் கடைகள் மூடப்பட்டன.
இதனிடையே கடைகளை திறக்க மறுத்த மேற்பார்வையாளர்கள் மற்றும் விற்பனையாளர்களுக்கு டாஸ்மாக் நிர்வாகம் நேற்று முன் தினம் மண்டல வாரியாக மெமோ அனுப்பி விளக்கம் கேட்டது. மேலும், கடையை அடைத்து போராட்டத்தில் ஈடுபட்ட160 பணியாளர்கள் சஸ்பெண்ட் செய்யப்பட்டனர்.
இதனை தொடர்ந்து நேற்றைய தினமும் சென்னை உட்பட பல்வேறு மாவட்டங்களில் டாஸ்மாக் கடைகள் திறக்கப்படாமல் மூடப்பட்டது. 2-வது நாளாக கடைகளை மூடி போராட்டத்தில் ஊழியர்கள் ஈடுபட்டனர்.
ஊழியர்களின் தொடர் போராட்டம் காரணமாக, நேற்று மாலை நிலவரப்படி 798 ஊழியர்களுக்கு மெமோ வழங்கப்பட்டது டன், 81 பேரை சஸ்பெண்ட் செய்துள்ளதாக தகவல்கள் வெளியாகி உள்ளது.
மேலும், தற்போது வரை கடைகளை அடைத்து போராட்டத்தில் ஈடுபட்டவர்களுக்கு மண்டல வாரியாக மெமோக்கள் அனுப்பப்பட்டு வருவதாகவும், 300க்கும் மேற்பட்டவர்கள் சஸ்பெண்ட் செய்யப்பட்டிருக்கலாம் என தகவல்கள் தெரிவிக்கின்றன.
