திமுக ஆட்சியில் தனியார் பள்ளிகளுக்கு நிரந்தர அங்கீகாரம் வழங்க, கட்சி நிதி என்ற பெயரில் ரூ. 400 கோடி வரை வசூலித்து மோசடி செய்ததாக பதியப்பட்ட வழக்கில் திமுக முன்னாள் அமைச்சர் அன்பில் மகேஸை 3 நாள் போலீஸ் காவலில் எடுத்து விசாரிக்க அனுமதி அளித்து சென்னை ஊழல் தடுப்பு சிறப்பு நீதிமன்றம் உத்தரவிட்டுள்ளது.
திமுக ஆட்சியில் தனியார் பள்ளிகளுக்கு நிரந்தர அங்கீகாரம் வழங்க, கட்சி நிதி என்ற பெயரில் ரூ. 400 கோடி வரை வசூலித்து மோசடி செய்ததாக பதியப்பட்ட வழக்கில் திமுக முன்னாள் அமைச்சர் அன்பில் மகேஸ் கைது செய்யப்பட்டு, தற்போது புழல் சிறையில் அடைக்கப்பட்டுள்ளார். அவரை 5 நாள் போலீஸ் காவலில் எடுத்து விசாரிக்க அனுமதி கோரி, மத்திய குற்றப்பிரிவு போலீஸார் சென்னை ஊழல் தடுப்பு சிறப்பு நீதிமன்றத்தில் மனு தாக்கல் செய்தனர்.
இந்த மனு நீதிபதி எல்.எஸ்.சத்திய மூர்த்தி முன்னிலையில் விசாரணைக்கு வந்தது. காவல்துறை தரப்பு மற்றும் அன்பில் மகேஸ் தரப்பு வாதங்களைக் கேட்ட நீதிபதி, இன்று தனது தீர்ப்பினை வழங்கினார். தீர்ப்பில், “இன்று மதியம் 1 மணியில் இருந்து 4-ம் தேதி வரை 3 நாள் போலீஸ் காவலில் எடுத்து அன்பில் மகேஸை விசாரிக்க அனுமதி அளிக்கப்படுகிறது. உடல் ரீதியாகவோ மன ரீதியாகவோ அவரை துன்புறுத்தக் கூடாது. வழக்கறிஞர் உடன் இருந்தாலும், விசாரணையை கேட்கக் கூடாத தொலைவில் தான் அவர் இருக்க வேண்டும்.’ என நீதிபதி தெரிவித்துள்ளார்.
மேலும், அன்பில் மகேஸின் ஜாமீன் மனு மற்றும் பறிமுதல் செய்யப்பட்ட மின்னனு சாதனங்களை திரும்பத் தரக் கோரிய மனுக்கள் மீதான விசாரணை நவ.5-ம் தேதிக்கு தள்ளி வைக்கப்பட்டுள்ளது.
முன்னதாக, கடந்த அக். 30-ம் தேதி நீதிமன்றத்தில் இருதரப்பு வாதம் நடைபெற்றது. அன்பில் மகேஸ் தரப்பில் மூத்த வழக்கறிஞர் அபுடுகுமார் ராஜரத்தினம், வழக்கறிஞர் ரிச்சர்ட்ஸன் வில்சன் ஆகியோர் ஆஜராகி வாதாடினர். அப்போது அவர்கள், “சிறையில் முதல் வகுப்பு வழங்க நீதிமன்றம் உத்தரவிட்டும் அன்பில் மகேஸுக்கு சரியான உணவு வழங்கப்படவில்லை. சக கைதிகளுக்கு வழங்கும் சப்பாத்தியை வழங்கினர்.
இதனால் அவரது எடை 2 முதல் 4 கிலோ வரை குறைந்துள்ளது. போலீஸாரின் அனைத்து கேள்விகளுக்கும் அன்பில் மகேஸ் முறையாக பதில் அளித்துள்ளார். இந்த வழக்கு தொடர்பாக வேறு ஏதேனும் ஆவணங்கள் தேவைப்படுகிறது எனக் கூறினால் அதையும் மறுக்காமல் வழங்கத் தயாராக இருக்கிறோம்.
தனியார் பள்ளிகளுக்கு அங்கீகாரம் வழங்குவது தொடர்பான கூட்டத்தில் அமைச்சர் என்ற முறையில் அன்பில் மகேஸும், கல்வித் துறை அதிகாரிகளும் பங்கேற்றனர். கும்பகோணம் பள்ளி தீ விபத்து சம்பவத்துக்குப் பிறகு யாருக்குமே நிரந்தர அங்கீகாரம் வழங்கப்படுவதில்லை.
ஆனால், தனியார் பள்ளி நிர்வாகிகள் தரப்பில் 3 ஆண்டுகளுக்கு ஒரு முறை என இருந்த அங்கீகாரம் புதுப்பித்தலை 20 ஆண்டுகளுக்கு ஒருமுறை என மாற்றும்படி கோரிக்கை விடுத்தனர். அது தொடர்பாக தனியார் பள்ளி நிர்வாகிகள் மற்றும் அதிகாரிகளுடன் கலந்து ஆலோசித்து அதன் பிறகே அரசாணை பிறப்பிக்கப்பட்டது. எந்த அரசாணை காரணமாக போலீஸார் தற்போது அன்பில் மகேஸை கைது செய்துள்ளனரோ, அதே அரசாணைதான் தற்போதும் அமலில் உள்ளது.
கோடிக்கணக்கில் லஞ்சம் வாங்கியதாக குற்றம்சாட்டி அன்பில் மகேஸை கைது செய்துள்ள போலீஸார், லஞ்சம் கொடுத்தவர்களை இதுவரையிலும் கைது செய்யாதது ஏன்? யார், யாரெல்லாம் லஞ்சம் கொடுத்தார்களோ அவர்களையே இந்த வழக்கில் சாட்சிகளாக சேர்த்திருப்பது ஏன்? அன்பில் மகேஸ் எங்கும் ஓடி ஒளியப் போவதில்லை. முழுக்க, முழுக்க அரசியல் காரணமாகவே இந்த வழக்குப் பதியப்பட்டுள்ளது.
சிறையில் விளக்கை எரியவிட்டு தூங்கச் சொல்கின்றனர். முதல் வகுப்பு வழங்கப்படவில்லை. சிறையில் வீட்டு உணவு, உடை, மருந்து வழங்க வேண்டுமெனக் கோருவது அடிப்படை உரிமை. அதையும் தர மறுக்கின்றனர்.” என வாதிட்டனர்.
இந்த வழக்கின் விசாரணை அதிகாரியான போலீஸ் உதவி ஆணையர் செந்தில், அன்பில் மகேஸை காவலில் எடுத்து விசாரிக்கக் கோருவது ஏன் என்பது தொடர்பாகப் பிரமாணப் பத்திரம் தாக்கல் செய்தார். அப்போது போலீஸ் தரப்பில் ஆஜரான சிறப்பு அரசு குற்றவியல் வழக்கறிஞர் உஷாராணி, ‘‘சிறையில் அன்பில் மகேஸுக்கு உரிய மருத்துவ வசதிகள் செய்து கொடுக்கப்படும். வீட்டு உணவு தொடர்பாக பதிலளிக்க அவகாசம் அளிக்க வேண்டும். கட்சி நிதி எனக் கூறி ரூ. 400 கோடிக்கு மேல் லஞ்சமாக வசூலித்துள்ளனர்.
அந்த பணப்பரிமற்றம் குறித்தும், இந்த முறைகேட்டில் வேறு யார், யாருக்குத் தொடர்புள்ளது என்பது குறித்தும், முத்துக்குமார், சுரேஷ், அரசக்குமாரின் பங்கு குறித்தும், அன்பில் மகேஸ் மற்றும் அவரது பினாமிகளின் அசையும் மற்றும் அசையா சொத்து விவரங்கள் குறித்தும் விசாரணை நடத்தினால் மட்டுமே விடை கிடைக்கும். எனவே 5 நாட்கள் அவரை காவலில் எடுத்து விசாரிக்க அனுமதிக்க வேண்டும்’’ என்று வாதிட்டார்.
இருதரப்பு வாதங்களையும் கேட்ட நீதிபதி எல்.எஸ். சத்திய மூர்த்தி, ‘அன்பில் மகேஸ் கேட்கும் உணவு வகைகளை சிறை சமையல் அறையிலேயே தயாரித்து வழங்க வேண்டும். இல்லாவிட்டால், வீட்டில் இருந்து தயாரித்து தரும் உணவை சாப்பிட அனுமதிக்க வேண்டும். அந்த உணவுக்கு தான் பொறுப்பேற்றுக் கொள்வதாக அவரிடம் ஒப்புதல் கடிதம் பெற்றுக் கொள்ள வேண்டும். போலீஸ் காவல் கோரும் மனு மீதான தீர்ப்பு நவ.2ம் தேதிக்கு ஒத்திவைக்கப்படுகிறது’ என்று தெரிவித்திருந்தார். இந்நிலையில், அன்பில் மகேஸை 3 நாள் போலீஸ் காவலில் விசாரிக்க அனுமதி அளித்து நீதிபதி எல்.எஸ்.சத்திய மூர்த்தி உத்தரவிட்டுள்ளார்.
