பலுசிஸ்தானில் உள்ள ஒரு நெடுஞ்சாலையில், மர்ம கும்பல் ஒன்று கராச்சி கால்பந்து வீரர்களிடம் துப்பாக்கி முனையில் வழிப்பறி செய்துள்ளது.
பாகிஸ்தானின் பலுசிஸ்தான் மாகாண தலைநகர் குவெட்டாவில் நடைபெறும் முதல்வரின் தங்கக் கோப்பை கால்பந்துப் போட்டியில் பங்கேற்பதற்காக கராச்சி மாவட்ட மேற்கு கால்பந்து அணி வீரர்கள் நேற்று முன்தினம் பேருந்தில் குவெட்டா நகருக்கு சென்று கொண்டிருந்தனர்.
பலுசிஸ்தான் நெடுஞ்சாலையில் ஆயுதம் வைத்திருந்த ஒரு கும்பல் பேருந்தை இடைமறித்து நிறுத்தினர். பின்னர் துப்பாக்கியைக் காட்டி மிரட்டி அவர்களிடமிருந்த பணம், செல்போன்கள், மதிப்புமிகுந்த கருவிகள் உள்ளிட்ட பொருட்களை பறித்துச் சென்றுவிட்டனர். முன்னதாக, இதை எதிர்த்து கேள்வி கேட்ட சிலரை அவர்கள் துப்பாக்கி முனையில் அடித்தனர்.
குவெட்டா நகரை அடைந்ததும் கால்பந்து அணி நிர்வாகம் சார்பில் இதுதொடர்பாக போலீஸில் புகார் செய்யப்பட்டது. இதுகுறித்து போலீஸார் விசாரித்து வருகின்றனர். பலுசிஸ்தான் நெடுஞ்சாலையில் மஸ்துங் மாவட்டத்திலிருந்து குவெட்டா செல்லும் வழியில் தீவிரவாத கும்பலைச் சேர்ந்தவர்கள் பயணிகளை வழிமறித்து வழிப்பறி செய்யும் போக்கு அதிகரித்து வருகிறது என்பது குறிப்பிடத்தக்கது
