அமெரிக்க தலைநகர் வாஷிங்டன் மீது அணுக்கழிவு குண்டு தாக்குதல் அல்லது ரசாயன தாக்குதலை நடத்த ஈரான் ராணுவம் சதித் திட்டம் தீட்டியிருப்பதாக அமெரிக்க உளவுத் துறை எச்சரிக்கை விடுத்துள்ளது. கடந்த பிப்ரவரி மாதம் முதல் அமெரிக்கா, ஈரான் இடையே போர் நீடித்து வருகிறது.
ஹார்முஸ் ஜலசந்தி அருகே உள்ள ஈரானின் கெஷ்ம் தீவு மீது அமெரிக்க ராணுவம் அண்மையில் வான்வழி தாக்குதல் நடத்தியது. அப்போது ஈரானின் ரேடார்கள், ஏவுகணை தளங்கள் அழிக்கப்பட்டன. இதற்குப் பதிலடியாக வளைகுடா நாடுகளில் உள்ள அமெரிக்க ராணுவ தளங்கள் மீது ஈரான் ராணுவம் ஏவுகணைகள், ட்ரோன்கள் மூலம் தொடர் தாக்குதல்களை நடத்தி வருகிறது.
இந்த சூழலில் அமெரிக்க உளவுத் துறை, அதிபர் ட்ரம்ப் நிர்வாகத்திடம் விரிவான அறிக்கையை தாக்கல் செய்திருக்கிறது. அதில், “அமெரிக்க தலைநகர் வாஷிங்டன் மற்றும் மூத்த அமைச்சர்கள், அதிகாரிகள் மீது அணுக்கழிவு குண்டு தாக்குதல் அல்லது ரசாயன தாக்குதலை நடத்த ஈரான் ராணுவம் சதித் திட்டம் தீட்டியிருக்கிறது” என்று எச்சரிக்கை விடுக்கப்பட்டு உள்ளது.
ஈரான் நாட்டில் வழக்கமான வெடிமருந்துடன் அணுக் கழிவுகளை சேர்த்து சக்திவாய்ந்த வெடிகுண்டுகள் தயாரிக்கப்பட்டு வருவதாகக் கூறப்படுகிறது. இது அழுக்கு குண்டு என்று அழைக்கப்படுகிறது. இந்த வெடிகுண்டுகளால் அணு குண்டு தாக்குதல் போன்ற பாதிப்புகளை ஏற்படுத்த முடியாது. எனினும் அழுக்கு குண்டு வெடித்துச் சிதறும் பகுதியில் கதிர்வீச்சு அபாயம் ஏற்படும்.
ஈரான் ராணுவத்தின் உளவாளிகள் அமெரிக்காவில் வசிக்கும் சில சமூக விரோதிகளைப் பயன்படுத்தி அழுக்கு குண்டுகளை அமெரிக்காவுக்குள் கடத்தியிருப்பதாகக் கூறப்படுகிறது. இவை ரகசிய இடத்தில் பதுக்கி வைக்கப்பட்டு இருப்பதாகவும் அவற்றின் மூலம் திடீர் தாக்குதல் நடத்த திட்டமிட்டு இருப்பதாகவும் தகவல்கள் வெளியாகி உள்ளன. இதைத் தொடர்ந்து தலைநகர் வாஷிங்டனில் பாதுகாப்பு அதிகரிக்கப்பட்டு உள்ளது.
முன்னெச்சரிக்கை நடவடிக்கையாக அமெரிக்க வெளியுறவு அமைச்சர் மார்கோ ரூபியோ, பாதுகாப்பு அமைச்சர் பீட் ஹெக்செத், நிதியமைச்சர் ஸ்காட் பெசென்ட் உள்ளிட்டோர் பாதுகாப்பான ராணுவ தளங்களுக்கு இடம் பெயர்ந்து உள்ளனர். அமெரிக்க மூத்த அதிகாரிகள், வெள்ளை மாளிகையின் மூத்த அதிகாரிகளும் ராணுவ தளங்களின் குடியிருப்புகளுக்கு மாறியுள்ளனர்.











