களியக்காவிளை அருகே தனியாா் மதுக்கூடத்தில் கத்தியால் வெட்டப்பட்ட தொழிலாளி, மருத்துவமனையில் உயிரிழந்தாா்.
களியக்காவிளை அருகேயுள்ள மீனச்சல் பகுதியைச் சோ்ந்த அப்பிச்செறுக்கன் மகன் ஜோசப் (50). தொழிலாளியான, இவரும் அதே பகுதியைச் சோ்ந்த கனகராஜ் மகன் மணிகண்டன் (45) என்பவரும், ஒரு குடும்பத்தைச் சோ்ந்த அக்கா, தங்கையை திருமணம் செய்துள்ளனா். இருவரும் மதுபோதையில் அடிக்கடி தகராறில் ஈடுபட்டு வந்துள்ளனா்.
இந்த நிலையில் கடந்த செப். 8 ஆம் தேதி படந்தாலுமூடு பகுதியில் உள்ள தனியாா் மதுக்கூடத்தில் ஜோசப், மது அருந்திக் கொண்டிருந்தாராம். அப்போது அங்கு வந்த மணிகண்டன், ஜோசப்பிடம் தகராறு செய்து அவரை கத்தியால் வெட்டிவிட்டு தப்பிச் சென்றாராம்.
இதுகுறித்து ஜோசப்பின் மனைவி மேரி ஸ்டெல்லா அளித்த புகாரின் பேரில், களியக்காவிளை போலீஸாா் வழக்குப் பதிந்து விசாரணை மேற்கொண்டு வந்தனா். இந்த நிலையில் பலத்த காயமடைந்து, திருவனந்தபுரம் தனியாா் மருத்துவமனையில் அனுமதிக்கப்பட்டு சிகிச்சை பெற்று வந்த ஜோசப் செவ்வாய்க்கிழமை உயிரிழந்தாா்.
இதையடுத்து கொலை முயற்சி வழக்கை போலீஸாா், கொலை வழக்காக மாற்றி, தலைமறைவான மணிகண்டனை தேடி வருகின்றனா்.
