இது சிவனின் தாண்டவம். இதற்கு எந்த வியூகமும் தேவையில்லை என்று காங்கிரஸ் மூத்த தலைவர் ராகுல் காந்தி தெரிவித்துள்ளார்.
எஸ்ஐஆர் விவகாரத்தில் தலைமைத் தேர்தல் ஆணையர் ஞானேஷ் குமார் பதவி விலகக் கோரி எதிர்க்கட்சிகள் பல்வேறு போராட்டங்களை நடத்தி வருகின்றன. இந்த சூழலில் டெல்லியில் உள்ள காங்கிரஸ் தலைமை அலுவலகத்தில் அந்த கட்சியின் மூத்தத் தலைவர் ராகுல் காந்தி பேசியதாவது: தலைமைத் தேர்தல் ஆணையர் ஞானேஷ் குமாரை பதவி நீக்கம் செய்ய வேண்டும். அடுத்து பிரதமர் மோடி, அமித் ஷாவை பதவியில் இருந்து நீக்க வேண்டும். இது ஒற்றை போராட்டம், பலதரப்பு போராட்டம் கிடையாது. எங்கள் லட்சியம் நிறைவேறும் வரை ஓயமாட்டோம்.
தற்போதைய போராட்டத்துக்கு ஒரு வியூகம் வகுக்க வேண்டும் என்று எனது தங்கை (பிரியங்கா காந்தி) அறிவுரை கூறினார். எனது தங்கைக்கு தெளிவான பதிலை அளித்தேன். இது சிவனின் தாண்டவம். இதற்கு வியூகம் தேவையில்லை. இன்றைய தினம் உச்ச நீதிமன்றம் நோக்கி பேரணி செல்கிறோம். நாளை வேறு ஏதாவது ஒரு போராட்டம் நடைபெறும். இடைவிடாமல் போராட்டங்கள் நடைபெற்றுக் கொண்டே இருக்கும். சிவனின் தாண்டவத்தில் யார் வேண்டுமானாலும் பங்கேற்கலாம்.
பிரதமர் நரேந்திர மோடிக்கு ஒரு விஷயத்தை கூற விரும்புகிறேன். அமலாக்கத் துறை, சிபிஐ, வெளியுறவுத் துறையைச் சேர்ந்த 200 அரசு அதிகாரிகள் எங்களோடு தொடர்பில் உள்ளனர். என்ன நடக்கிறது என்பதை அவர்கள் எங்களுக்கு தெளிவாக விளக்கி கூறுகின்றனர். தலைமைத் தேர்தல் ஆணையர் ஞானேஷ் குமார் வாக்கு திருட்டில் ஈடுபடுகிறார். அவரை பாதுகாக்க ஒட்டுமொத்த அரசு இயந்திரமும் பயன்படுத்தப்படுகிறது. எங்களது போராட்டம் ஒரு நாளில் ஓயாது. இடைவிடாமல் தொடர்ந்து போராடுவோம்.
உச்ச நீதிமன்ற தலைமை நீதிபதிக்கு கடிதம் அனுப்பினோம். இந்திய ஜனநாயகத்தை காப்பாற்ற வேண்டும். நேர்மையான முறையில் தேர்தலை நடத்த வேண்டும் என்ற எங்களது கவலையை அவர் புரிந்து கொண்டு உள்ளார். இதுதொடர்பாக உச்ச நீதிமன்றத்தில் மனு தாக்கல் செய்ய அவர் அறிவுறுத்தி உள்ளார். இதன்படி இண்டியா கூட்டணி தலைவர்கள் உச்ச நீதிமன்றத்துக்கு சென்று மனு தாக்கல் செய்வார்கள்.
ஒட்டுமொத்த டெல்லியும் சிறைச்சாலையாக மாற்றப்பட்டு உள்ளது. டெல்லிக்கு வரும் ரயில்கள், பேருந்துகள் தடுத்து நிறுத்தப்படுகின்றன. போராட்டத்தில் ஈடுபடும் பெண்களை ஆர்எஸ்எஸ்காரர்கள் அடித்து விரட்டுகின்றனர். தலைமைத் தேர்தல் ஆணையர் ஞானேஷ்குமாரை பிரதமர் மோடி பாதுகாக்கிறார். இவ்வாறு அவர் கூறினார்.
