ஜெம் வீரமணி பாலியல் வழக்கில் போலீஸ் காவலில் எடுத்து விசாரிக்கப்பட்ட சாந்தி, அவரது கணவர் மகேந்திர சிம்மன் இருவரும் மீண்டும் சிறையில் அடைக்கப்பட்டனர்.
சிறுமிகளை பாலியல் வன்கொடுமை செய்ததாக ஜெம் கிரானைட் உரிமையாளரான வீரமணி, அவருக்கு உடந்தையாக இருந்த சாந்தி, அவரது கணவர் மகேந்திர சிம்மன், வீரமணியின் உதவியாளர் கணேசன் ஆகியோர் கைது செய்யப்பட்டனர்.
இவர்களில் சாந்தி, மகேந்திர சிம்மன் ஆகியோரை போலீஸார் 3 நாள் காவலில் எடுத்து விசாரணை நடத்தினர். இருவரிடமும் 3 நாட்களாக இரவு, பகலாக விசாரணை நடத்தப்பட்டது.
அப்போது, வீரமணியால் பாதிக்கப்பட்ட சிறுமிகள் எத்தனை பேர்? எவ்வளவு நாட்களாக இந்த குற்றம் நிகழ்ந்தது? யார் யாருக்கெல்லாம் தொடர்பு உள்ளது, பின்னணியில் கட்சி, சமூக தலைவர்கள், காவல்துறையினர் யாரேனும் உள்ளனரா என்பன உள்ளிட்ட பல்வேறு கேள்விகள் கேட்கப்பட்டன.
இருவரும் அளித்த வாக்கு மூலத்தை போலீஸார் எழுத்து மூலமாகவும், வீடியோவாகவும் பதிவு செய்துள்ளனர். இந்நிலையில், இருவரது போலீஸ் காவல் நேற்று மாலையுடன் முடிவடைந்ததால் அவர்களை நீதிபதி பத்மா முன்பு ஆஜர்படுத்திய போலீஸார் மீண்டும் புழல் சிறையில் அடைத்தனர்.
இவர்கள் அளித்த வாக்குமூலத்தின் அடிப்படையில் மேலும் சிலருக்கு சம்மன் அனுப்பப்பட்டுள்ளதாக போலீஸார் தெரிவித்தனர்.
