திருவள்ளூர் மாவட்டம், அத்திவாக்கத்தில் வெற்றுக்கால் கோழிச் சண்டை நேற்றும், நேற்று முன்தினமும் நடைபெற்றது.
இப்போட்டியில் தமிழகத்தின் பல்வேறு மாவட்டங்கள் மற்றும் பிற மாநிலங்களைச் சேர்ந்த 400-க்கும் மேற்பட்ட கோழிகள் கலந்து கொண்டன.
2 நாட்கள் நடைபெற்ற இப்போட்டியில் நீதிமன்ற அறிவுறுத்தல் மற்றும் வழிகாட்டுதலின்படி கோழிகளுக்கு கத்தி, பிளேடு உள்ளிட்டவை காலில் கட்டக்கூடாது, போதை உணவு கோழிகளுக்கு கொடுக்கக் கூடாது என்பது உள்ளிட்ட பல்வேறு விதிகளுக்கு உட்பட்டு நடைபெற்றது.
மேலும், ஒவ்வொரு ஜோடிக்கும் 20 நிமிடங்கள் போட்டி, 20 நிமிடங்கள் ஓய்வு, மீண்டும் 20 நிமிடம் போட்டி என ஒரு மணி நேரம் ஒவ்வொரு ஜோடிக்கும் இடையே போட்டிகள் நடைபெற்றது.
தமிழகத்தில் நாட்டுக்கோழி, லகான் கோழி, வெள்ளை கோழியை போன்று சண்டைக் கோழியையும் வளர்க்க வேண்டும் என்ற ஆர்வத்தை பொதுமக்களிடம் உருவாக்கவும், சத்தான கோழியை சாப்பிட வேண்டும் என்ற ஆர்வத்தை ஏற்படுத்தவும் இதுபோன்ற வெற்றுக்கால் கோழிச் சண்டை நிகழ்ச்சியை நடத்துவதாக இப்போட்டியை நடத்தும் கிராமத்தைச் சேர்ந்தவர்கள் தெரிவித்தனர்.
