ஐபிஎல் தொடரில் இருந்து ஓய்வு பெற்றார் தோனி: 2027-ம் ஆண்டு சீசனில் ஆலோசகராக செயல்படுவார்

0
11

ஐபிஎல் தொடரின் 2027-ம் ஆண்டு சீசனுக்கான வீரர்கள் தக்கவைப்பு தொடர்பாக முடிவெடுப்பதற்காக சிஎஸ்கே அணி நிர்வாகம் கடந்த 15-ம் தேதி காணொளி வாயிலாக ஆலோசனை நடத்தியது.

அப்போது எந்தெந்த வீரர்களை விடுவிக்க வேண்டும், தக்க வைக்க வேண்டும் என ஆலோசனை நடத்தப்பட்டது. இதில் பங்கேற்ற தோனி விடுவிக்கப்படும் வீரர்களின் பட்டியலில் என்னையும் சேர்த்துக்கொள்ளுங்கள், நான் ஓய்வு பெற விரும்புகிறேன் என தெரிவித்துள்ளார். இந்தத் தகவலை சிஎஸ்கே அணியின் இணை உரிமையாளர் ரூபா குருநாத் தெரிவித்துள்ளார்.

45 வயதான தோனி, கடந்த சில ஆண்டுகளாகத் தொடர்ந்து காயங்களால் பாதிக்கப்பட்டு வந்தார். இதனால் ஐபிஎல் போட்டிகளில் அவரது பங்களிப்பு படிப்படியாகக் குறைந்தது. 2026-ம் ஆண்டு ஐபிஎல் தொடரில் ஒரு போட்டியில்கூட அவரால் விளையாட முடியவில்லை.

கடந்த 2020-ம் ஆண்டு சர்வதேச கிரிக்கெட்டில் இருந்து ஓய்வு பெறுவதாக இன்ஸ்டாகிராம் பதிவு மூலம் அறிவித்த தோனி, தற்போது ஐபிஎல் பயணத்துக்கும் விடைகொடுத்துள்ளார். எனினும், அவரது ஓய்வு குறித்து சிஎஸ்கே வெளியிட்ட அறிக்கையில் தோனியின் நேரடி கருத்து இடம்பெறவில்லை.

உலகக் கோப்பையை வென்ற இந்திய அணியின் கேப்டனான தோனி, சிஎஸ்கே அணிக்கு 5 முறை ஐபிஎல் சாம்பியன் பட்டத்தை வென்று கொடுத்துள்ளார். சிஎஸ்கே அணிக்காக 5,314 ரன்கள் குவித்துள்ள அவர், அந்த அணியின் அதிக ரன்கள் எடுத்த வீரர்கள் பட்டியலில் 2-வது இடத்தில் உள்ளார். மேலும், அந்த அணிக்காக அதிக போட்டிகளில் விளையாடிய வீரர் என்ற பெருமையையும் பெற்றுள்ளார்.

மொத்தம் 272 போட்டிகளில் சிஎஸ்கே அணிக்காகக் களமிறங்கியுள்ளார். 2024-ம் ஆண்டு சிஎஸ்கே அணியின் கேப்டன் பொறுப்பில் இருந்து தோனி விலகினார். அவருக்குப் பதிலாக ருதுராஜ் கெய்க்வாட் கேப்டனாக நியமிக்கப்பட்டார். ஐபிஎல் தொடரில் சென்னை சூப்பர் கிங்ஸ் அணிக்கு 5 முறை கோப்பையை வென்று கொடுத்த தோனி, சாம்பியன்ஸ் லீக் டி20 தொடரிலும் 2 முறை (2010, 2014) சிஎஸ்கே அணிக்கு சாம்பியன் பட்டம் பெற்றுத் தந்துள்ளார்.

இந்தத் தொடரில் அதிக முறை கோப்பை வென்ற கேப்டன் என்ற பெருமையும் தோனிக்கே உண்டு. சாம்பியன்ஸ் லீக் டி20 தொடர் கடைசியாக 2014-ம் ஆண்டு நடைபெற்றது.

Google search engine

LEAVE A REPLY

Please enter your comment!
Please enter your name here