யுபிஐ பரிவர்த்தனைக்கு சேவை கட்டண விதிப்பை தள்ளிவைப்பதாக அறிவித்த மத்திய நிதியமைச்சர் நிர்மலா சீதாராமனுக்கு தமிழ்நாடு வணிகர் சங்கங்களின் பேரமைப்பு தலைவர் ஏ.எம்.விக்கிரமராஜா நன்றி தெரிவித்துள்ளார்.
இது குறித்து அவர் வெளியிட்டுள்ள அறிக்கையில், “மத்திய அரசின் டிஜிட்டல் மயமாக்கல் கொள்கையின்படி, வங்கி பணப் பரிவர்த்தனைகளை இலவச யுபிஐ பணப் பரிவர்த்தனைக்கு மாற்றி, பொதுமக்களிடையே டிஜிட்டல் மயமாக்கலை ஊக்கப்படுத்தி பெருவாரியான மக்கள் பயன்படுத்தி வந்தனர்.
இந்நிலையில், ரூ.2 ஆயிரத்துக்கு மேல் உள்ள யுபிஐ பணப்பரிவர்த்தனைக்கு அக்டோபர் 15 முதல் 0.4 சதவீதம் சேவை கட்டணம் விதிப்பதாகவும், அச்சேவை கட்டண விதிப்பை வணிகர்கள்தான் செலுத்த வேண்டும் என்ற நிர்ப்பந்தத்தையும் மத்திய அரசு ஏற்படுத்தி இருக்கின்றது. இதற்கு தமிழகம் மட்டுமல்லாது, அகில இந்திய அளவிலும் மிகப்பெரும் எதிர்ப்பு உருவாகி இருந்தது.
யுபிஐ சேவை கட்டணத்துக்கு எதிர்ப்பு தெரிவிக்கும் வகையில், எனது தலைமையில் கடந்த அக்.12-ம் தேதி தமிழகம் முழுவதும் உள்ள பேரமைப்பின் அமைப்பு ரீதியான 61 மாவட்டங்களிலும் வணிகர்கள் பேட்ஜ் அணிந்து மாநிலம் தழுவிய அறவழிப் போராட்டத்தை முன்னெடுத்தனர்.
மேலும், அன்று மாலையே மத்திய நிதியமைச்சர் நிர்மலா சீதாராமனை டெல்லியில் நேரில் சந்தித்தும் யுபிஐ பணப்பரிவர்த்தனை கட்டணத்தை திரும்பப் பெற வேண்டுமென்று கோரிக்கையை முன்வைத்து, அதற்கு நல்லதொரு முடிவை விரைவில் அறிவிப்பதாக மத்திய நிதியமைச்சர் தெரிவித்திருந்தார்.
இந்நிலையில், யுபிஐ சேவை கட்டண விதிப்பை தள்ளிவைப்பதாக மத்திய அரசு அறிவித்துள்ளது. இது வணிகர்கள் ஒற்றுமையின் பலமாகவும், வணிகர்களுக்கான வெற்றியாகவும் கருதி, மிகுந்த மன மகிழ்ச்சியோடு, மத்திய அமைச்சர் நிர்மலா சீதாராமனுக்கு நன்றியைத் தெரிவித்துக் கொள்கின்றோம்” என்று விக்கிரமராஜா கூறியுள்ளார்.
