ஜெர்மனியில் ஜென்-ஸி போராட்டம் தீவிரமடைந்துள்ளதை அடுத்து நேற்று முன்தினம் பிராங்கபர்ட் நகரில் கடைகள் சூறையாடப்பட்டதுடன், காவல் துறையினர் மீது பெட்ரோல் குண்டுகளை வீசியும் போராட்டக்காரர்கள் தாக்குதல் நடத்தினர்.
அத்தியாவசிய பொருட்களின் விலை உயர்வு, கல்வி மற்றும் சுகாதாரத் துறைக்கான நிதி ஒதுக்கீடு குறைப்பு மற்றும் கட்டாய ராணுவ சேவை திட்டத்துக்கு எதிர்ப்பு தெரிவித்து ஜெர்மனி முழுவதும் ஜென்-ஸி எனப்படும் இளைய தலைமுறையைச் சேர்ந்த பல்லாயிரக்கணக்கான இளைஞர்கள் தீவிரப் போராட்டத்தில் ஈடுபட்டு வருகின்றனர்.
நேற்று முன்தினம் இரவு பிராங்க்பர்ட் உள்ளிட்ட சில நகரங்களில் இந்தப் போராட்டம் வன்முறையாக மாறியதில் கடைகள் சூறையாடப்பட்டன. காவல் துறையினர் மீது பெட்ரோல் குண்டுகள் வீசி தாக்குதல் நடத்தப்பட்டது. ‘ஜென்-ஸி ரிகெல்ட்’ என்ற பெயரில் ஒருங்கிணைக்கப்பட்டு வரும் இயக்கமானது பெர்லின், பிராங்க்பர்ட், முனிச், ஹம்பர்க் உட்பட நாட்டின் 34-க்கும் மேற்பட்ட முக்கிய நகரங்களில் மிகப்பெரிய பேரணிகளை நடத்தி வருகிறது.
கல்வி மற்றும் சுகாதாரக் கட்டமைப்புக்கு அதிக நிதி ஒதுக்குதல், பணவீக்கத்தால் உயர்ந்துள்ள வாழ்வாதாரச் செலவுகளைக் கட்டுப்படுத்துதல், மற்றும் அரசாங்கம் பரிசீலித்து வரும் கட்டாய ராணுவச் சேவையை உடனடியாகக் கைவிடுதல் ஆகியவை இந்த இயக்கத்தில் உள்ள இளைஞர்களின் முதன்மையான கோரிக்கைகளாக உள்ளன.
“நாங்கள் அமைதிக்கும் சுதந்திரத்துக்குமே போராடுகிறோமே தவிர, போருக்கும் கட்டாயத்துக்கும் அல்ல. கல்வி மற்றும் சுகாதார அமைப்புக்கு கூடுதல் ஆதரவு அளிக்கப்பட வேண்டும்” என்று பெர்லின் பேரணியில், அந்த இயக்கத்தின் செய்தித் தொடர்பாளர் லினா பிரெட்ரிக் தெரிவித்துள்ளார். பெரும்பாலான இடங்களில் பகல் நேரத்தில் அமைதியான முறையில் பேரணிகள் நடைபெற்ற போதிலும், சனிக்கிழமை இரவு பிராங்க்பர்ட் நகர மையப் பகுதியில் பேரணி வன்முறையாக மாறியது. நகரின் வணிக வளாகக் கண்ணாடிகள் உடைக்கப்பட்டு, இரண்டு பெரிய கடைகள் முற்றிலுமாக சூறையாடப்பட்டன.
மேலும், பாதுகாப்புப் பணியில் ஈடுபட்டிருந்த காவல் துறை மற்றும் அவசரகால வாகனங்கள் மீது பெட்ரோல் குண்டுகள் மற்றும் பட்டாசுகள் வீசி தாக்குதல் நடத்தப்பட்டது.
ஹம்பர்க் நகரில் சாலைத் தடுப்புகளுக்கு தீ வைக்கப்பட்ட நிலையில், கொலோன் பகுதியில் வன்முறையைக் கட்டுப்படுத்த காவல் துறையினர் நீரைப் பீச்சியடிக்கும் வாகனங்களைப் பயன்படுத்தினர்.
இளைஞர்களின் போராட்டங்களைத் தீவிர இடதுசாரி அமைப்புகளும், வெளிநாட்டுத் தீவிரவாத ஆதரவுக் குழுக்களும் தங்கள் ஆதாயத்துக்காகப் பயன்படுத்த முயற்சிப்பதாக ஜெர்மனி உள்துறை அமைச்சகம் எச்சரித்துள்ளது.
பிரான்ஸ், செர்பியா போன்ற ஐரோப்பிய நாடுகளில் இளைஞர்கள் முன்னெடுத்து வரும் வரிசையான அரசு எதிர்ப்புப் போராட்டங்களின் தொடர்ச்சியாகவே ஜெர்மனியிலும் இந்த ஜென்-ஸி போராட்டம் வெடித்துள்ளது குறிப்பிடத்தக்கது.
