தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி டெல்லியில் இன்று (அக்.10) சிஜேபி சார்பில் போராட்டத்துக்கு அழைப்பு விடுத்துள்ளது. இந்தச் சூழலில் போராட்டத்துக்கு டெல்லி காவல் துறை அனுமதி மறுத்துள்ளது. இதனால், அதிரடி கைது நடவடிக்கை மேற்கொள்ளப்பட்டு வருகிறது.
இந்நிலையில், ஜந்தர் மந்தர் மற்றும் மத்திய டெல்லி பகுதியை இணைக்கும் பல்வேறு முக்கிய சாலை சந்திப்புகளில் டெல்லி போலீஸார் தீவிர வாகன சோதனையில் ஈடுபட்டு வருகின்றனர். இதற்காக தடுப்புகளை அமைத்து, அந்த வழியாக செல்லும் வாகன ஓட்டிகளிடம் ‘என்ன காரணத்துக்காக செல்கிறார்கள்?’ என விசாரித்த மேற்கொண்ட பிறகே அனுமதிக்கின்றனர்.
இத்தகைய நிலையில் அரசு ஊழியர்கள் தங்களிடம் உள்ள அடையாள அட்டையை காட்டிய பிறகு அந்தந்த பகுதிகளில் பயணிக்க போலீஸார் அனுமதிப்பதாக தகவல் கிடைத்துள்ளது. மேலும், தெற்கு மற்றும் தென்கிழக்கு பகுதியில் இருந்து வரும் சாமானிய மக்கள், போலீஸாரின் கெடுபிடி காரணமாக பாதிக்கப்பட்டுள்ளனர். இதனால் மத்திய டெல்லி பகுதி ஸ்தம்பித்துள்ளது.
இதோடு டெல்லியின் எல்லை பகுதிகள், முக்கிய ரயில் நிலையங்கள், விமான நிலையத்திலும் போலீஸார் குவிக்கப்பட்டுள்ளனர். இந்த பகுதிகளில் இருந்து செல்ல முயலும் போராட்டக்காரர்களை தடுக்கும் நோக்கில் இந்த ஏற்பாடு என்று களத்தில் இருந்து தகவல் வந்துள்ளது.
போராட்டக்காரர்களை கைது செய்யும் போலீஸார்
டெல்லியில் ஜந்தர் மந்தர் மற்றும் அந்த பகுதியை ஒட்டிய இடங்களில் காணப்படும் போராட்டக்காரர்களை தடுத்து நிறுத்தும் காவல் துறையினர், அவர்களை கைது செய்தும் வருகின்றனர். பெண்கள் அதிகளவில் இந்த போராட்டத்தில் பங்கேற்பார்கள் என்று எதிர்பார்க்கப்படுகின்ற காரணத்தால் ‘பிங்க் மகளிர் காவல் படை’-யினரும் அங்கு குவிக்கப்பட்டுள்ளனர்.
துருவ் ராட்டி கைது
சிஜேபி போராட்டத்தில் யூடியூபர் துருவ ராட்டி பங்கேற்க வாய்ப்புள்ளது என்று கருதப்படும் நிலையில், குருகிராமில் அவரை போலீஸார் கைது செய்துள்ளனர். அவரை போலீஸார் எங்கு கொண்டு சென்றுள்ளனர் என்ற தகவலும் கிடைக்கவில்லை. இதற்கு சிஜேபி கண்டனம் தெரிவித்துள்ளார்.
மேலும், ஒற்றை நபரை காக்க மத்திய அரசு அதன் படை பலத்தை பயன்படுத்துகிறது. இதனால் டெல்லி முடங்கியுள்ளது என்று ஆம் ஆத்மி உள்ளிட்ட எதிர்க்கட்சிகள் விமர்சித்துள்ளன.
சிஜேபி ஜந்தர் மாந்தர் போராட்டம் 2.0
தலைமைத் தேர்தல் ஆணையர் ஞானேஷ் குமார் பதவி விலகக் கோரி கரப்பான்பூச்சி ஜனதா கட்சி (சிஜேபி) சார்பில் டெல்லியில் இன்று காலவரையற்ற போராட்டம் தொடங்கப்பட உள்ளது.
நீட் வினாத்தாள் கசிவை கண்டித்து சிஜேபி சார்பில் கடந்த ஜூன், ஜூலையில் டெல்லி ஜந்தர் மந்தரில் மிகப்பெரிய போராட்டம் நடத்தப்பட்டது. இதன்காரணமாக மத்திய கல்வி அமைச்சர் பதவியில் இருந்து தர்மேந்திர பிரதான் விலகினார். இந்த சூழலில் எஸ்ஐஆர் விவகாரம் தொடர்பாக தலைமைத் தேர்தல் ஆணையர் ஞானேஷ்குமார் பதவி விலக வேண்டும். இல்லையென்றால் அக்டோபர் 10-ம் தேதி முதல் டெல்லியில் காலவரையற்ற போராட்டம் தொடங்கப்படும் என்று சிஜேபி அறிவித்தது.
இதைத் தொடர்ந்து டெல்லியில் பலத்த பாதுகாப்பு ஏற்பாடுகள் செய்யப்பட்டு உள்ளன. டெல்லி காவல் துறையைச் சேர்ந்த 15,000 போலீஸாரும், மத்திய பாதுகாப்புப் படைகளை சேர்ந்த 23,000 வீரர்களும் குவிக்கப்பட்டு உள்ளனர். ஒட்டுமொத்தமாக 38,000 வீரர்கள் டெல்லியில் பாதுகாப்புப் பணியில் ஈடுபட்டு உள்ளனர். நாட்டின் பல்வேறு பகுதிகளில் இருந்து டெல்லிக்கு இயக்கப்படும் 13 விரைவு ரயில்கள் ரத்து செய்யப்பட்டு உள்ளன.
கிழக்கு ரயில்வே நிர்வாகமும் சில விரைவு ரயில்களை ரத்து செய்திருக்கிறது. வெளிமாநிலங்களில் இருந்து டெல்லிக்கு வரும் பேருந்துகள் தீவிரமாக கண்காணிக்கப்படுகின்றன. டெல்லி மற்றும் புறநகர்ப் பகுதி விடுதிகள், ஓட்டல்களில் தங்கியிருப்போர் குறித்து விசாரணை நடத்தப்படுகிறது. டெல்லியை ஒட்டிய அண்டை மாநிலங்களின் எல்லைகளில் தீவிர சோதனை நடத்தப்படுகிறது. டெல்லியின் 57 மெட்ரோ ரயில் நிலையங்கள் இன்று முழுமையாக மூடப்படும் என்று அறிவிக்கப்பட்டது.
போராட்டத்தில் பங்கேற்கும் சிஜேபி தொண்டர்களை தடுப்பு காவலில் வைக்க திருமண மண்டபங்கள், மைதானங்கள் தயார் நிலையில் வைக்கப்பட்டு உள்ளன. முன்வரிசை பாதுகாப்பு பணியில் ஈடுபடும் போலீஸாரின் உடைகளில் கேமரா பொருத்தப்பட்டு இருக்கிறது. சிஜேபி அமைப்பின் 10,000 நிர்வாகிகள் தடுப்பு காவலில் வைக்கப்பட்டு உள்ளனர்.
