பாகிஸ்தான் விமானப் படையின் எப்16 ரக போர் விமானங்களை மேம்படுத்த அமெரிக்க அரசு ஒப்புதல் வழங்கி உள்ளது. பாகிஸ்தான் விமானப் படையில் எப்16 ரகத்தை சேர்ந்த 76 போர் விமானங்கள் உள்ளன.
இவை அமெரிக்க தயாரிப்பு போர் விமானங்கள் ஆகும். கடந்த 1990-ம் ஆண்டு முதல் எப்16 போர் விமானங்களுக்கு தேவையான உதிரி பாகங்கள், தொழில்நுட்பங்களை பாகிஸ்தானுக்கு வழங்க அமெரிக்கா மறுத்து வந்தது. இதன் காரணமாக பாகிஸ்தானின் பெரும்பாலான எப்16 போர் விமானங்கள் தரையிறக்கப்பட்டு உள்ளன.
தற்போது அந்த நாட்டின் விமானப் படையில் சீன தயாரிப்பான ஜேஎப்-17எஸ் போர் விமானங்களே அதிக அளவில் பயன்படுத்தப்பட்டு வருகிறது. இந்த சூழலில் பாகிஸ்தானின் எப்16 போர் விமானங்களை மேம்படுத்த அமெரிக்க அரசு அண்மையில் ஒப்புதல் வழங்கி உள்ளது. இதன்படி பாகிஸ்தான் போர் விமானங்களுக்கு தேவையான உதிரி பாகங்கள், தொழில்நுட்பங்கள் வழங்கப்பட உள்ளன.
குறிப்பாக எதிரிகளின் ரேடார்களில் இருந்து தப்பிக்க உதவும் சிறப்பு கருவிகள் பாகிஸ்தானின் எப்16 போர் விமானங்களில் பொருத்தப்பட உள்ளன. இது தொடர்பான வரைவு அறிக்கை கடந்த 8-ம் தேதி அமெரிக்க நாடாளுமன்றத்தில் தாக்கல் செய்யப்பட்டது.
