தேர்தல் ஆணைய விவகாரத்தில் மக்களவை எதிர்க்கட்சி தலைவர் ராகுல் காந்தி சமூகத்துக்கு தவறான தகவலை தருகிறார் என மத்திய அமைச்சர் கிரண் ரிஜிஜு குற்றம் சாட்டியுள்ளார்.
இதுகுறித்து மத்திய நாடாளுமன்ற விவகாரங்கள் துறை அமைச்சர் கிரண் ரிஜிஜு செய்தியாளர்களிடம் நேற்று கூறியதாவது: மக்களவை எதிர்க்கட்சி தலைவர் ராகுல் காந்தி இந்தியத் தேர்தல் ஆணையம் மீது வைக்கும் விமர்சனங்களும், தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்ற அவரது கோரிக்கையும் சமூகத்துக்குத் தவறான தகவலைக் கொண்டு சேர்க்கும்.
ராகுல் காந்தி இதுபோன்ற கருத்துகளைப் பொதுவெளியில் பெரிதுபடுத்துவது சரியான நடவடிக்கை அல்ல; அது சமூகத்துக்குத் தவறான தகவலையே பரப்பும். வாக்காளர் பட்டியல் சிறப்பு தீவிர திருத்தப் பணி (எஸ்ஐஆர்) தொடர்பாக மத்திய அரசையும் தேர்தல் ஆணையத்தையும் ராகுல் காந்தி தீவிரமாக விமர்சித்து வருவது துரதிர்ஷ்டவசமானது. இவ்வாறு ரிஜிஜு கூறினார்.
முன்னதாக பத்திரிகையாளர் சந்திப்பில் பேசிய ராகுல் காந்தி, 2024 மக்களவைத் தேர்தல் மற்றும் அதன் பிறகு நடைபெற்ற சட்டப்பேரவை தேர்தல்கள் முறைகேடாக நடத்தப்பட்டவை என்றும், வாக்காளர்களின் உரிமைகளைப் பாதுகாக்கத் தவறிய தலைமைத் தேர்தல் ஆணையர் ஞானேஷ் குமார் உடனடியாகப் பதவி விலக வேண்டும் என்றும் வலியுறுத்தியது குறிப்பிடத்தக்கது. இதற்கு பொறுப்பேற்று பிரதமர் மோடியும், அமித் ஷாவும் பதவி விலக வேண்டுமென்றும் அவர் வலியுறுத்தியிருந்தார்.
