மேற்கு இந்தியத் தீவுகள் அணிக்கு எதிரான 2-வது ஒருநாள் கிரிக்கெட் போட்டியில் 406 ரன்கள் இலக்கை வெற்றிகரமாக துரத்தி வெற்றி பெற்று சாதனை படைத்தது இந்திய அணி.
குவாஹாட்டியில் நேற்று நடைபெற்ற இந்த ஆட்டத்தில் முதலில் பேட் செய்த மேற்கு இந்தியத் தீவுகள் அணி 50 ஓவர்களில் 7 விக்கெட்கள் இழப்புக்கு 405 ரன்கள் குவித்தது. தொடக்க வீரரான ஜாண் கேம்பல் 68 பந்துகளில், 5 சிக்ஸர்கள், 9 பவுண்டரிகளுடன் 101 ரன்களும், கேப்டன் ஷாய் ஹோப் 94 பந்துகளில், 3 சிக்ஸர்கள், 8 பவுண்டரிகளுடன் 104 ரன்களும், அமிர் ஜாங்கூ 77 பந்துகளில், 3 சிக்ஸர்கள், 13 பவுண்டரிகளுடன் 114 ரன்களும் விளாசி மிரட்டினர்.
சர்வதேச ஒருநாள் கிரிக்கெட் போட்டியில் ஓர் இன்னிங்ஸில் மேற்கு இந்தியத் தீவுகளை சேர்ந்த 3 வீரர்கள் சதம் அடித்துள்ளது இதுவே முதன்முறையாகும். மேலும் 405 ரன்கள் என்பது சர்வதேச ஒருநாள் கிரிக்கெட் போட்டியில் மேற்கு இந்தியத் தீவுகள் அணியின் அதிகபட்ச ரன் குவிப்பாக அமைந்தது. இதற்கு முன்னர் அந்த அணி கடந்த 2019-ம் ஆண்டு செயின்ட் ஜார்ஜ் மைதானத்தில் இங்கிலாந்து அணிக்கு எதிராக நடைபெற்ற ஒருநாள் போட்டியில் 389 ரன்கள் குவித்ததே அதிகபட்சமாக அமைந்திருந்தது.
406 ரன்கள் இலக்குடன் பேட் செய்த இந்திய அணி கேப்டன் ஷுப்மன் கில், ரோஹித் சர்மா ஆகியோரது அதிரடியால் 43.3 ஓவர்களில் 2 விக்கெட்கள் இழப்புக்கு 406 ரன்கள் எடுத்து சாதனை வெற்றியை பதிவு செய்தது. ஏனெனில் ஒருநாள் கிரிக்கெட் போட்டிகளில் இதற்கு முன்னர் இந்திய அணி அதிகபட்சமாக 362 ரன்களையே வெற்றிகரமாக துரத்தியிருந்தது. இந்த சாதனையை 2013-ம் ஆண்டு ஜெய்ப்பூரில் ஆஸ்திரேலியாவுக்கு எதிரான ஒருநாள் போட்டியில் நிகழ்த்தியிருந்தது.
தனது 35-வது சதத்தை விளாசிய ரோஹித் சர்மா 75 பந்துகளில், 6 சிக்ஸர்கள், 10 பவுண்டரிகளுடன் 101 ரன்கள் விளாசிய நிலையில் ஜெய்டன் சீல்ஸ் பந்தில் எல்பிடபிள்யூ ஆனார். முதல் விக்கெட்டுக்கு ரோஹித் சர்மா, ஷுப்மன் கில் ஜோடி 26.2 ஓவர்களில் 255 ரன்களை வேட்டையாடியது.
ஷுப்மன் கில் 133 பந்துகளில், 8 சிக்ஸர்கள், 26 பவுண்டரிகளுடன் 223 ரன்கள் விளாசி ஆட்டமிழக்காமல் இருந்தார். ஒருநாள் கிரிக்கெட்டில் ஷுப்மன் கில் இரட்டை சதம் விளாசுவது இது 2-வது முறையாகும். இதற்கு முன்னர் கடந்த 2023-ல் ஹைதராபாத்தில் நியூஸிலாந்து அணிக்கு எதிரான ஒருநாள் போட்டியில் 208 ரன்கள் விளாசியிருந்தார். இதன் மூலம் ரோஹித் சர்மாவுக்கு பிறகு இரு முறை இரட்டை சதம் விளாசிய வீரர் என்ற பெருமையையும் ஷுப்மன் கில் பெற்றார்.
விராட் கோலி 19 பந்துகளில், ஒரு சிக்ஸர், 3 பவுண்டரிகளுடன் 29 ரன்கள் விளாசிய நிலையில் ஷமர் ஜோசப் பந்தில் ஆட்டமிழந்தார். ருதுராஜ் கெய்க்வாட் 31 ரன்கள் சேர்த்தார்.
8 விக்கெட்கள் வித்தியாசத்தில் வெற்றி பெற்ற இந்திய அணி 3 ஆட்டங்கள் கொண்ட ஒருநாள் கிரிக்கெட் போட்டித் தொடரை 2-0 என கைப்பற்றியது. முதல் ஒருநாள் போட்டியில் இந்திய அணி 8 விக்கெட்கள் வித்தியாசத்தில் வெற்றி பெற்றிருந்தது. கடைசி மற்றும் 3-வது போட்டி வரும் 3-ம் தேதி நியூ சண்டிகரில் நடைபெறுகிறது.
குறைந்த பந்துகளில் இரட்டை சதம்
மே.இ.தீவுகள் அணிக்கு எதிரான 2-வது ஒருநாள் போட்டியில் இந்திய அணியின் கேப்டன் ஷுப்மன் கில் 117 பந்துகளில் இரட்டை சதம் விளாசினார். இதன் மூலம் குறைந்த பந்துகளில் இரட்டை சதம் விளாசிய வீரர் என்ற சாதனையை படைத்தார் ஷுப்மன் கில். இதற்கு முன்னர் கடந்த 2022-ம் ஆண்டு வங்கதேச அணிக்கு எதிரான ஒருநாள் போட்டியில் இந்திய அணியின் இஷான் கிஷன் 126 பந்துகளில் இரட்டை சதம் அடித்ததே சாதனையாக இருந்தது. இதனை ஷுப்மன் கில் முறியடித்து புதிய சாதனை படைத்துள்ளார்.
ரோஹித் சர்மா 12,000 ரன்கள்
மேற்கு இந்தியத் தீவுகள் அணிக்கு எதிரான 2-வது ஒருநாள் போட்டியில் ரோஹித் சர்மா 73 ரன்களை எடுத்திருந்த போது சர்வதேச அரங்கில் 12 ஆயிரம் ரன்களை கடந்தார். இந்த மைல் கல் சாதனையை எட்டும் 3-வது இந்திய வீரர் ரோஹித் சர்மா ஆவார். இந்த வகையில் சச்சின் டெண்டுல்கர், விராட் கோலி ஆகியோரும் 12 ஆயிரம் ரன்களுக்கு மேல் குவித்துள்ளனர்.
