ஆஷஸ் கிரிக்கெட் தொடரின் 4-வது டெஸ்ட் போட்டியில் 175 ரன்கள் என்ற இலக்கை இங்கிலாந்து அணி விரட்டுகிறது.
முதல் இன்னிங்ஸில் ஆஸ்திரேலிய அணி 152 ரன்களுக்கு ஆட்டமிழந்தது. இதைத் தொடர்ந்து விளையாடிய இங்கிலாந்து அணியை 110 ரன்களுக்கு ஆஸ்திரேலிய அணி சுருட்டி பதிலடி கொடுத்துள்ளது.
இங்கிலாந்து அணி, ஆஸ்திரேலியாவில் சுற்றுப்பயணம் செய்து 5 போட்டிகள் கொண்ட டெஸ்ட் தொடரில் விளையாடி வருகிறது. முதல் 3 டெஸ்ட் போட்டிகளில் ஆஸ்திரேலிய அணி வெற்றி பெற்று தொடரைக் கைப்பற்றி விட்டது.
இந்நிலையில் இந்தத் தொடரின் 4-வது டெஸ்ட் போட்டி மெல்பர்ன் மைதானத்தில் நேற்று காலை தொடங்கியது. கிறிஸ்துமஸ் தினத்துக்கு மறுநாள் நடைபெறும் போட்டி என்பதால் இந்தப் போட்டி பாக்ஸிங் டே டெஸ்ட் போட்டி என்று அழைக்கப்படுகிறது.
முதலில் விளையாடிய ஆஸ்திரேலிய அணி, இங்கிலாந்து வீரர்கள் ஜோஷ் டங், கஸ் அட்கின்ஸன், பென் ஸ்டோக்ஸ், பிரைடன் கார்ஸ் ஆகியோரது அபார பந்துவீச்சால் 45.2 ஓவர்களில் 152 ரன்களுக்கே ஆட்டமிழந்தது.
ஆஸ்திரேலிய அணியில் அதிகபட்சமாக மைக்கேல் நேசர் மட்டும் 49 பந்துகளில் 35 ரன்கள் குவித்து ஆட்டமிழந்தார். டிராவிஸ் ஹெட் 12, ஜேக் வெதரால்டு 10, மார்னஸ் லபுஷேன் 6, கேப்டன் ஸ்டீவன் ஸ்மித் 9, உஸ்மான் கவாஜா 29, அலெக்ஸ் கேரி 20, கேமரூன் கிரீன் 17, ஸ்காட் போலண்ட் 0, மிட்செல் ஸ்டார்க் 1 ரன் எடுத்து வீழ்ந்தனர்.
ஜோஷ் டங் அபாரமாக பந்துவீசி 45 ரன்கள் விட்டுக்கொடுத்து 5 விக்கெட்களைக் கைப்பற்றினார். கஸ் அட்கின்ஸன் 2, பிரைடன் கார்ஸ், பென் ஸ்டோக்ஸ் ஆகியோர் தலா ஒரு விக்கெட்டை வீழ்த்தினர்.
இதைத் தொடர்ந்து இங்கிலாந்து தனது முதல் இன்னிங்ஸை தொடங்கியது. பேட்டிங்கில் மோசமாக செயல்பட்ட ஆஸ்திரேலிய அணி, பந்துவீச்சில் பதிலடி கொடுத்து 29.5 ஓவர்களில் இங்கிலாந்து அணியை 110 ரன்களில் சுருட்டியது.
அந்த அணியின் நட்சத்திர ஆட்டக்காரர் ஹாரி புரூக் மட்டும் 34 பந்துகளில் 41 ரன்கள் குவித்தார். கேப்டன் பென் ஸ்டோக்ஸ் 16, கஸ் அட்கின்ஸன் 28 ரன்கள் சேர்த்தனர். மற்ற வீரர்கள் எவரும் ஒற்றை இலக்க ரன்களைத் தாண்டவில்லை.
ஜாக் கிராவ்லி 5, பென் டக்கெட் 2, ஜேக்கப் பெத்தேல் 1, ஜோ ரூட் 0, ஜேமி ஸ்மித் 2, வில் ஜேக்ஸ் 5, பிரைடன் கார்ஸ் 4, ஜோஷ் டங் ஒரு ரன் சேர்த்தனர். ஆஸ்திரேலிய அணி தரப்பில் மைக்கேல் நேசர் 4 விக்கெட்களைக் கைப்பற்றினார். ஸ்காட் போலண்ட் 3 விக்கெட்களையும், ஸ்டார்க் 2 விக்கெட்களையும் வீழ்த்தினர்.
இதனால் ஆஸ்திரேலிய அணி முதல் இன்னிங்ஸில் 42 ரன்கள் முன்னிலை பெற்றது. இதைத் தொடர்ந்து தனது 2-வது இன்னிங்ஸை தொடங்கிய ஆஸ்திரேலிய அணி விக்கெட் இழப்பின்றி 4 ரன்கள் எடுத்துளது. டிராவிஸ் ஹெட் 0, ஸ்காட் போலண்ட் 3 ரன்களுடன் களத்தில் உள்ளனர். 46 ரன்கள் முன்னிலையுடன் இன்று 2-ம் நாள் ஆட்டத்தை ஆஸ்திரேலிய அணி தொடங்கியது.
இன்று சீரான இடைவெளியில் ஆஸ்திரேலிய அணி விக்கெட்களை இழந்தது. 34.3 ஓவர்களில் 132 ரன்களுக்கு ஆஸ்திரேலியா ஆல் அவுட் ஆனது. இங்கிலாந்து பந்துவீச்சாளர்கள் பிரைடன் கார்ஸ் 4, ஸ்டோக்ஸ் 3, டங் 2, அட்கின்சன் 1 விக்கெட் கைப்பற்றினர்.
இந்தப் போட்டியில் 175 ரன்கள் எடுத்தால் வெற்றி என்ற இலக்கை இங்கிலாந்து அணி விரட்டுகிறது. அந்த அணி இரண்டாவது இன்னிங்ஸில் 2 விக்கெட் இழப்புக்கு 77 ரன்கள் எடுத்துள்ளது. கிராவ்ல் மற்றும் பெத்தேல் களத்தில் உள்ளனர். டக்கெட் மற்றும் பிரைடன் கார்ஸ் ஆகியோர் விக்கெட் இழந்தனர். இங்கிலாந்து அணியின் கைவசம் 8 விக்கெட் உள்ளது, அந்த அணியின் வெற்றிக்கு தேவையான ரன்கள் 98.
3 ஆயிரம் ரன்கள்: டெஸ்ட் போட்டிகளில் குறைந்த பந்துகளில் 3 ஆயிரம் ரன்களை வேகமாக எட்டியவர் என்ற சாதனையை இங்கிலாந்து வீரர் ஹாரி புரூக் படைத்துள்ளார்.
நேற்றைய போட்டியின்போது அவர் இந்த சாதனையை எட்டினார். இதுவரை 34 டெஸ்ட் போட்டிகளில் விளையாடி புரூக், தற்போது 3,034 ரன்களை 54.17 சராசரியுடன் எடுத்துள்ளார். இதில் 10 சதம், 14 அரை சதங்கள் அடங்கும். அவரது அதிகபட்ச ஸ்கோர் 317 ஆகும். இவர் 3,468 பந்துகளில் இந்த ரன்களை எட்டி அதிவேகமாக 3 ஆயிரம் டெஸ்ட் போட்டி ரன்களை எடுத்தவர் என்ற சாதனையை படைத்துள்ளார்.
3 ஆயிரம் ரன்களை வேகமாக (குறைந்த பந்துகளில்) எட்டிய வீரர்கள் விவரம்:
1. ஹாரி புரூக் (இங்கிலாந்து) – 3,468 பந்துகள்
2. ஆடம் கில்கிறைஸ்ட் (ஆஸி) – 3,610 பந்துகள்.
3. டேவிட் வார்னர் (ஆஸ்திரேலியா) – 4,047 பந்துகள்.
4. ரிஷப் பந்த் (இந்தியா) – 4,095 பந்துகள்.
5. வீரேந்தர் சேவாக் (இந்தியா) – 4,129 பந்துகள்.
மெல்பர்னில் 5 விக்கெட்: நேற்றைய போட்டியில் இங்கிலாந்து வீரர் ஜோஷ் டங் 5 விக்கெட்களைச் சாய்த்தார். இதன்மூலம் 21-ம் நூற்றாண்டில் மெல்பர்ன் கிரிக்கெட் மைதானத்தில் 5 விக்கெட்களைச் சாய்த்த முதல் இங்கிலாந்து வீரர் என்ற சாதனையை ஜோஷ் டங் படைத்தார். இதற்கு முன்பு 1998-ல் இங்கிலாந்து வீரர்கள் டேரன் காவ், டீன் ஹெட்லி ஆகியோர் தலா 5 விக்கெட்களை எடுத்து இந்த சாதனையை படைத்திருந்தனர்.
8 ஆயிரம் ரன்கள்: சர்வதேச கிரிக்கெட் போட்டிகளில் 8 ஆயிரம் ரன்கள் எடுத்த வீரர்கள் வரிசையில் ஆஸ்திரேலிய வீரர் உஸ்மான் கவாஜா சேர்ந்துள்ளார். நேற்றைய போட்டியில் அவர் 52 பந்துகளைச் சந்தித்து 29 ரன்களைச் சேர்த்தார். இதன்மூலம் 136 சர்வதேச போட்டிகளில் விளையாடியுள்ள அவர் மொத்தம் 8,001 ரன்களை எடுத்துள்ளார். டெஸ்ட் போட்டிகளில் 6,206 ரன்களும், ஒருநாள் போட்டிகளில் 1,554 ரன்களும், சர்வதேச டி20 போட்டிகளில் 241 ரன்களையும் அவர் குவித்துள்ளார்.
அதிக கேட்ச்: இந்தப் போட்டியில் இங்கிலாந்து வீரர் ஜோ ரூட், ஒரு கேட்ச் பிடித்தார். இதன்மூலம் டெஸ்ட் போட்டிகளில் அதிக கேட்ச்களை(மொத்தம் 214 கேட்ச்கள்) பிடித்த வீரர் என்ற சாதனையை ஜோ ரூட் படைத்துள்ளார்.
இந்த வரிசையில் ஸ்டீவன் ஸ்மித் 211 கேட்ச்களுடன் 2-வது இடத்திலும், ராகுல் திராவிட் 210 கேட்ச்களுடன் 3-வது இடத்திலும், மஹேல ஜெயவர்த்தனே 205 கேட்ச்களுடன் 4-வது இடத்திலும், ஜேக்கஸ் காலிஸ் 200 கேட்ச்களுடன் 5-வது இடத்திலும் உள்ளனர்.
