நாட்டின் 80-வது சுதந்திர தினத்தையொட்டி, சென்னை புனித ஜார்ஜ் கோட்டை கொத்தளத்தில் முதல்வர் விஜய் நாளை முதல்முறையாக தேசியக் கொடியை ஏற்றிவைத்து உரையாற்றுகிறார். தகைசால் தமிழர், அப்துல் கலாம், கல்பனா சாவ்லா உட்பட பல்வேறு விருதுகளையும் வழங்குகிறார்.
தமிழக சட்டப்பேரவைத் தேர்தலில் வெற்றி பெற்ற தவெக, கூட்டணி கட்சிகளின் ஆதரவுடன் ஆட்சியமைத்துள்ளது. அக்கட்சியின் தலைவர் விஜய், முதல்வராக கடந்த மே 10-ம் தேதி பதவியேற்றார்.
இந்நிலையில், நாட்டின் 80-வது சுதந்திர தினம் நாளை (ஆக.15) கொண்டாடப்படுகிறது. தலைநகர் டெல்லியில் பிரதமர் மோடி தேசியக் கொடியை ஏற்றி வைக்கிறார்.
அதேபோல, தமிழகத்தின் தலைநகர் சென்னையில் உள்ள புனித ஜார்ஜ் கோட்டை கொத்தளத்தில் முதல்வர் விஜய் தேசியக் கொடியை முதல்முறையாக ஏற்றிவைத்து உரையாற்றுவதுடன், பல்வேறு விருதுகளையும் வழங்குகிறார்.
முன்னதாக, காலை 8.30 மணிக்கு கோட்டை கொத்தளம் பகுதிக்கு வரும் முதல்வர் விஜய்யை தலைமைச் செயலர் சாய்குமார் வரவேற்று, காவல் துறை அதிகாரிகளை அறிமுகம் செய்து வைப்பார்.
பிறகு, காவல் துறையின் பல்வேறு பிரிவினர் அளிக்கும் அணிவகுப்பு மரியாதையைப் பார்வையிடும் முதல்வர், 8.45 மணிக்கு கோட்டை கொத்தளத்தில் தேசியக் கொடியை ஏற்றிவைத்து மரியாதை செலுத்துகிறார்.
தொடர்ந்து நடைபெறும் விழாவில், தகைசால் தமிழர் விருது, அப்துல் கலாம் விருது, துணிவு மற்றும் சாகசத்துக்கான கல்பனா சாவ்லா விருது, முதல்வரின் நல்ஆளுமை விருது, மாற்றுத் திறனாளிகளுக்கு சிறப்பாக பணியாற்றிய மருத்துவர், நிறுவனம், சமூக சேவகர், கூட்டுறவு வங்கிக்கான விருதுகள், சமூகநல சேவைக்கான விருது, சிறந்த மாநகராட்சிகள், நகராட்சிகள், பேரூராட்சிகள் ஆகியவற்றுக்கான விருதுகளையும் முதல்வர் வழங்குகிறார்.
நீதிபதிகள், அமைச்சர்கள், முக்கிய விருந்தினர்கள் நிகழ்ச்சியைக் காண, கோட்டை கொத்தளம் எதிரே 3 மேடைகள் அமைக்கப்பட்டுள்ளன.
5 அடுக்கு பாதுகாப்பு
விழா நடைபெறும் ஜார்ஜ் கோட்டையைச் சுற்றி 5 அடுக்கு பாதுகாப்பு வளையம் அமைக்கப்படுகிறது. சென்னை விமான நிலையத்துக்கு 5 அடுக்கு பாதுகாப்பு போடப்பட்டுள்ளது.
சென்ட்ரல், எழும்பூர் உள்ளிட்ட அனைத்து ரயில், மெட்ரோ ரயில் நிலையங்கள், வணிக வளாகங்கள், கடற்கரைப் பகுதிகள், வழிபாட்டுத் தலங்களிலும் பாதுகாப்பு ஏற்பாடுகள் பலப்படுத்தப்பட்டுள்ளன.
மாநிலம் முழுவதும் முக்கிய இடங்களில் தீவிர சோதனை மற்றும் கண்காணிப்பு பணிகள் மேற்கொள்ளப்பட்டு வருகின்றன. விடுதிகள், ஓட்டல்களில் போலீஸார் சோதனை நடத்தி வருகின்றனர்.
சென்னை பெருநகரகாவல் எல்லை முழுவதும் நான்கு சக்கர மற்றும் இருசக்கர ரோந்து வாகனங்கள் மூலம் போலீஸார் தீவிர ரோந்துப் பணியில் ஈடுபட்டுள்ளனர். முக்கிய சாலைகளில் தடுப்புகள் அமைத்து, வாகனத் தணிக்கையும் தீவிரப்படுத்தப்பட்டுள்ளது.
சந்தேகத்துக்குரிய நபர்கள், ஆதரவின்றி நிற்கும் வாகனங்கள் குறித்து தகவல் கிடைத்தால் உடனே போலீஸாருக்கு தெரிவிக்குமாறு பொதுமக்களுக்கு அறிவுறுத்தப்பட்டுள்ளது. சென்னையில் சுமார் 10 ஆயிரம் போலீஸார் உட்பட தமிழகம் முழுவதும் ஒரு லட்சம் போலீஸார் பாதுகாப்பு, கண்காணிப்பு பணியில் ஈடுபடுகின்றனர்.
