“கர்நாடக மாநிலத்தில் வறட்சியால் பாதிக்கப்பட்ட விவசாயிகளுக்கு தலா ரூ.5 ஆயிரம் நிவாரணமாக வழங்கப்படும்” என கர்நாடக முதல்வர் டி.கே.சிவகுமார் தெரிவித்தார்.
இதுகுறித்து, பெங்களூருவில் நேற்று முதல்வர் டி.கே.சிவகுமார் செய்தியாளர்களிடம் கூறுகையில், “கர்நாடகாவில் நிலவும் கடும் வறட்சியால் 200-க்கும் மேற்பட்ட தாலுகாக்கள் பாதிக்கப்பட்டுள்ளன. பாதிக்கப்பட்ட விவசாயிகள் குறித்த தகவல்களை திரட்டி மத்திய அரசுக்கு அறிக்கை அளித்திருக்கிறோம். வறட்சி நிலவரத்தை பார்வையிட மத்திய அரசின் குழுவை அனுப்ப கோரியுள்ளோம். மத்திய அரசிடம் கேட்கப்பட்ட நிதி இன்னும் ஒதுக்கப்படவில்லை.
கர்நாடக விவசாயிகளின் கவலை போக்குவதில் எங்களுடைய அரசு உறுதியாக இருக்கிறது. அதன்படி, முதல் கட்டமாக விவசாயிகளுக்கு வறட்சி நிவாரணமாக ரூ.5 ஆயிரம் வழங்க முடிவெடுக்கப்பட்டுள்ளது. இதில், முதல் தவணையாக ரூ. 2,500 விவசாயிகளின் வங்கி கணக்கில் வரவு வைக்கப்பட்டுள்ளது.
தகுதியுள்ள அனைத்து விவசாயிகளுக்கும் இந்த உதவித் தொகை சென்றடையும். சமூக வலைத்தளங்களில் பரவும் வதந்தியை யாரும் நம்ப வேண்டாம். வங்கி, கூட்டுறவு வங்கியில் கடன் பெற்ற விவசாயிகளுக்கு நிவாரண தொகை சென்று சேர்வதில் சில நடைமுறை சிக்கல்கள் இருக்கின்றன. அதனை அரசு அதிகாரிகள் பரிசீலித்து உரிய நடவடிக்கை எடுப்பார்கள்.
மத்திய அரசு நிவாரண நிதி வழங்கினாலும் வழங்காவிட்டாலும் நாங்கள் ரூ.5,000 வரை வழங்குவோம். இதுதவிர, வறட்சியால் பாதிக்கப்பட்டவர்களுக்கு ஏக்கருக்கு ரூ.2,500 வழங்கப்படும்” என்றார். துணை முதல்வர் பரமேஷ்வரா கூறுகையில், “வறட்சி நிவாரணம் வழங்குவதற்காக அரசு முதல் கட்டமாக ரூ.1,250 கோடி ஒதுக்கி உள்ளது. இதனால், சுமார் 50 லட்சம் விவசாயக் குடும்பங்கள் பயனடையும்” என்றார்.
