பிஃபா உலகக் கோப்பை கால்பந்து தொடரின் நாக் அவுட் சுற்றில் நேற்று அமெரிக்காவின் ஃபாக்ஸ்பரோவில் உள்ள பாஸ்டன் மைதானத்தில் நடைபெற்ற ஆட்டத்தில் 4 முறை சாம்பியனான ஜெர்மனி, பராகுவே அணியுடன் பலப்பரீட்சை நடத்தியது. ஆட்டத்தின் முதல் பாதியில் ஜெர்மனி அணி 78 சதவீதம் பந்தை தங்கள் வசம் வைத்திருந்த போதிலும், பராகுவேயின் பலத்த தற்காப்பு அரணை அவர்களால் உடைக்க முடியவில்லை.
ஆட்டத்தின் 42-வது நிமிடத்தில் பராகுவே வீரர் மிகுவல் அல்மிரோன் தனது இடது காலால் அடித்த ஒரு பாஸ் மூலம், ஜெர்மனியின் அலெக்சாண்டர் பாவ்லோவிச் மற்றும் நதானியேல் பிரவுன் ஆகிய இருவரையும் பிரித்து மதியாஸ் காலாசாவிற்கு பந்தைக் கடத்தினார். காலாசா அந்த பந்தை, ஜெர்மனி அணியின் தற்காப்பு வீரர்களால் கவனிக்கப்படாமல் தனியாக நின்றிருந்த ஹூலியோ என்சிசோவுக்கு கிராஸ் செய்தார்.
என்சிசோ அதை மிக எளிதாகத் தலையால் முட்டி கோல்கீப்பர் மானுவல் நோயரைக் கடந்து கோலாக மாற்றினார். இதனால் பராகுவே அணி முதல் பாதி ஆட்டத்தில் 1-0 முன்னிலை பெற்றது. இரண்டாவது பாதியில் ஜெர்மனி பதிலடி கொடுத்தது. 54-வது நிமிடத்தில் அந்த அணியின் வீரர் புளோரியன் விர்ட்ஸ் கொடுத்த கிராஸை, நட்சத்திர வீரரான காய் ஹவர்ட்ஸ் தலையால் முட்டி கோலாக மாற்றினார்.
இதனால் ஆட்டம் 1-1 என்ற கோல் கணக்கில் சமநிலையை எட்டியது. நிர்ணயிக்கப்பட்ட 90 நிமிடங்கள் வரையிலும் இதே நிலையே நீடித்தது. காயங்களுக்கு இழப்பீடாக 6 நிமிடங்களிலும் இரு அணிகள் தரப்பில் மேற்கொண்டு கோல் ஏதும் அடிக்கப்படவில்லை. இதனால் ஆட்டம் கூடுதல் நேரத்துக்கு சென்றது. 104-வது நிமிடத்தில் ஜெர்மனி வீரர் நத்தானியேல் பிரவுன் கார்னரில் இருந்து அடித்த பந்தை பாக்ஸ் பகுதிக்குள் நின்ற ஜோனாதன் தா தலையால் முட்டி கோல் வலைக்குள் திணித்தார்.
ஆனால், கோல் வலைக்குள் பந்து செல்லும் முன் ஜெர்மனி வீரர் வால்டெமர் ஆண்டன், பராகுவே கோல்கீப்பரை ஃபவுல் செய்ததது விஏஆர் சோதனையில் தெரியவந்ததால் அந்த கோல் மறுக்கப்பட்டது. 120 நிமிடங்களுக்கு பிறகும் ஆட்டம் 1-1 என சமநிலையிலேயே இருந்தது. இதனால் வெற்றியாளரைத் தீர்மானிக்க பெனால்டி ஷூட்-அவுட் முறை கடைபிடிக்கப்பட்டது.
இதில் பராகுவே 4-3 என்ற கோல் கணக்கில் ஜெர்மனியை வீழ்த்தி ரவுண்ட் ஆப் 16 சுற்றுக்கு முன்னேறியது. பெனால்டி ஷூட் அவுட்டில் முதலில் இரு அணிகளுக்கும் தலா 5 வாய்ப்புகள் வழங்கப்பட்டன. இதில் முதலில் ஜெர்மனி வீரர் காய் ஹேவர்ட்ஸ் அடித்த பந்தை பராகுவே கோல்கீப்பர் ஆர்லான்டோ கில் அற்புதமாக தடுத்தார். அதேவேளையில் பராகுவே வீரர் மவுரிசியோ தனது வாய்ப்பை கோலாக மாற்றினார். இதனால் பராகுவே 1-0 என முன்னிலை பெற்றது.
தொடர்ந்து 2-வது வாய்ப்பில் ஜெர்மனி அணி தரப்பில் ஜோஸ்வா கிம்மிச்சும், பராகுவே தரப்பில் கஸ்தவோ கோமேஸும் கோல் அடித்தனர். 3-வது வாய்ப்பில் ஜெர்மனியின் முசியாலாவும், பராகுவேயின் மதியாஸ் காலார்ஸாவும் தங்களது வாய்ப்பை கோலாக மாற்றினர். 4-வது வாய்ப்பில் ஜெர்மனி அணியின் நிக் வால்ட்மேட் அடித்த பந்தை பராகுவே கோல்கீப்பர் ஆர்லான்டோகில் தடுத்தார். அதேவேளையில் பராகுவே அணியின் அன்டோனியோ சனாப்ரியா அடித்த பந்து கோல்கம்பத்தின் இடதுபுறம் வெளியே சென்று ஏமாற்றம் அளித்தது.
கடைசி வாய்ப்பில் ஜெர்மனி அணியின் நதியம் அமிரி கோல் அடித்தார். மறுபுறம் பராகுவே வீரர் ஃபேபியன் பால்புவெனா அடித்த பந்தை ஜெர்மனி அணியின் கோல்கீப்பரான மானுவல் நோயர் தடுத்தார். இதனால் ஆட்டம் 3-3 என சமநிலையை எட்டியது. இதையடுத்து ‘சடன் டெத்’ முறை கடைபிடிக்கப்பட்டது. இதில் ஒரே ஒரு வாய்ப்பு மட்டுமே வழங்கப்படும்.
சடன் டெத் முறையில் ஜெர்மனி அணியின் வீரர் ஜொனாதன் தா, கோல்கம்பத்துக்கு மேலே உயரமாக அடித்து ஏமாற்றம் அளித்தார். அதேவேளையில் பராகுவே அணியின் ஜோஸ் கனாலே தனது வாய்ப்பை கோலாக மாற்றி அசத்தினார். முடிவில் பராகுவே அணி 4-3 என்ற கோல் கணக்கில் வெற்றி பெற்று ரவுண்ட் ஆஃப் 16 சுற்றுக்கு முன்னேறியது. ஜெர்மனி அணி தொடரில் இருந்து வெளியேறியது. ரவுண்ட் ஆஃப் 16 சுற்றில் பராகுவே அணி பிரான்ஸ் அல்லது சுவீடனை எதிர்கொள்ளும்.
கால் நூற்றாண்டுக்கு பிறகு..
உலகக் கோப்பை கால்பந்து வரலாற்றில் இதற்கு முன்னர் ஜெர்மனி – பராகுவே அணி கடந்த 2002-ம் ஆண்டு தொடரின் ரவுண்ட் ஆஃப் 16 சுற்றில் நேருக்கு நேர் மோதி இருந்தன. இதில் ஜெர்மனி 1-0 என்ற கணக்கில் பராகுவேயை வீழ்த்தியிருந்தது. இந்த தோல்விக்கு கிட்டத்தட்ட கால் நூற்றாண்டுக்கு பிறகு, பராகுவே தற்போது பதிலடி கொடுத்துள்ளது.
முதன்முறையாக ஷூட் அவுட்டில் தோல்வி
சர்வதேச தொடர்களில் ஜெர்மனி அணி தான் எதிர்கொண்ட ஏழு பெனால்டி ஷூட்-அவுட்களில் ஆறில் வெற்றி பெற்றிருந்தது. கடந்த 1976-ம் ஆண்டு ஐரோப்பிய சாம்பியன்ஷிப் இறுதிப் போட்டியில் செக்கோஸ்லோவாக்கியாவிடம் தோல்வியடைந்ததற்கு பிறகு, ஜெர்மனி அணி தொடர்ச்சியாக ஆறு பெனால்டி ஷூட்-அவுட்களில் வென்றிருந்தது. இந்நிலையில் தற்போது முதன்முறையாக பெனால்டி ஷூட் அவுட்டில் தோல்வியை சந்தித்து தொடரில் இருந்து வெளியேறி உள்ளது.
தொடரும் சோகம்
கடந்த 2014-ம் ஆண்டு உலகக் கோப்பை தொடரின் இறுதிப்போட்டியில் அர்ஜெண்டினாவை 1-0 என்ற கணக்கில் வீழ்த்தி ஜெர்மனி தனது நான்காவது முறையாக பட்டம் வென்றிருந்தது. அதன் பிறகு முதன்முறையாக நடப்பு தொடரில்தான் அந்த அணி நாக் அவுட் சுற்றில் விளையாடியது. கடந்த 2 முறையும் ஜெர்மனி லீக் சுற்றுடன் வெளியேறி இருந்த நிலையில் இம்முறை மிகுந்த எதிர்பார்ப்பு நிலவியது. ஆனால் இம்முறை அந்த அணி நாக் அவுட் சுற்றை கடக்க முடியாமல் வெளியேறி உள்ளது.
அசத்திய பராகுவே
பிஃபா தரவரிசையில் 34-வது இடத்தில் இருக்கும் பராகுவே அணி, உலகக் கோப்பை போட்டியில் வெற்றி பெறுவதற்கு மிகக் குறைந்த வாய்ப்புகளைக் கொண்ட பலவீனமான அணியாகக் கருதப்பட்டது. ஆனால், அந்த அணி 12-வது இடத்தில் இருந்த பலம் வாய்ந்ஜெர்மனியை வீழ்த்தி அனைவரையும் வியக்கவைத்துள்ளது.
