விஜய் சேதுபதி, லிஜோமோல் ஜோஸ் உள்பட பலர் நடித்துள்ள ‘பத்தா’ படத்தை பாலாஜி தரணிதரன் இயக்கியுள்ளார். சாய் அபயங்கர் இசையமைத்துள்ள இப்படம் அக். 1-ல் வெளியாகி வரவேற்பைப் பெற்றுள்ளது. இதன் வெற்றி விழா சென்னையில் நேற்று நடந்தது. படக்குழுவினர் கலந்துகொண்டனர்.
விஜய் சேதுபதி பேசும்போது, “சந்தோஷமா இருந்தா எனக்கு காய்ச்சல் வரும். இப்ப ரொம்ப சந்தோஷமா இருக்கேன். ஒரு கூட்டத்தில் நிற்கும்போது, அங்கிருக்கிற பலர் நம்மிடம் அன்பு செலுத்தும்போதும் வாரி அணைத்துக் கொள்ளும்போதும் நம் வெற்றியை அவங்க வெற்றியா கொண்டாடும்போதும் இந்த வாழ்க்கை, வரம்தான் அப்படினு ஞாபகப்படுத்திக்கிட்டே இருக்கு.
இந்த வெற்றியை, கொண்டாட்டத்தை எங்களுக்கு அளித்த ரசிகர்களுக்கு நன்றி. பாலாஜி தரணிதரனின் படங்கள் எனக்குப் பிடிக்கும். ‘சீதக்காதி’ படத்தில் கமல், அமிதாப்பச்சன், மோகன்லால் நடிக்கலாம் என்று அவர் யோசித்தார்.
பக்கத்திலேயே நான் இருக்கிறேனே என்று வருத்தப்பட்டேன். ஆனா, அந்தப் படம் திரும்ப எனக்கு வந்தபோது ரொம்ப சந்தோஷப்பட்டேன். அப்ப ‘96’ படமும் ‘சீதக்காதி’யும் ஒரே நேரத்தில் வந்தது. எது எனது 25-வது படமாக இருக்கணும் என்று நான் நினைக்கும்போது ‘சீதக்காதி’யை தேர்வு செய்தேன். இப்ப அவர் இயக்கியிருக்கிற ‘பத்தா’ வேற மாதிரி கதை.
இந்த மாதிரி படங்கள்ல நடிக்கிறது கஷ்டம். நான் ரொம்ப ஈசியா நடிக்கிறதா எல்லோரும் சொல்றாங்க. இல்லை மக்களே, ரத்தவாந்தி மட்டும்தான் எடுக்கலை; ஒவ்வொரு படத்துலயும் கஷ்டப்பட்டுதான் நடிக்கிறேன். இந்தப் படத்தை நம்பிய அட்லிக்கு நன்றி. அதுதான் எனக்கு கிடைச்ச பெரிய நம்பிக்கை” என்றார்.
