‘டாட் நங்கை’ என்ற தனது குறும்படத்தின் கதையைத் திருடி ‘டோரதி’ படத்தை இயக்கிய கார்த்திக் சுப்புராஜ், மற்றும் தயாரிப்பு நிறுவனம் மீது நடவடிக்கை எடுக்கக் கோரி குறும்பட இயக்குநர் மதுரை மைந்தன் என்ற முகமது செரிப், மதுரை மாநகர காவல் ஆணையர் அலுவலகத்தில் புகார் மனு அளித்துள்ளார்.
அந்த மனுவில், “கரோனா காலகட்டத்தில் ‘டாட் நங்கை’ என்ற பெயரில் திருநங்கைகள் குறித்த 3 நிமிட குறும்படத்தை தயாரித்தேன். இதை சமூக வலைதளங்களில் பதிவிட்டபோது ஏராளமானோரின் கவனத்தை ஈர்த்தது. இக்கதையை திரைப்படமாக தயாரிக்க முயற்சித்த நிலையில், தாமதம் ஏற்பட்டது.
இந்நிலையில், சமீபத்தில் வெளியான ‘டோரதி’ படத்தை பார்த்த சிலர், எனது குறும்படத்தின் கதைபோல் இருப்பதாகத் தெரிவித்தனர். படத்தை பார்த்தபோது, எனது குறும்பட கதைக்கருவை என் அனுமதியின்றி பயன்படுத்தி கார்த்திக் சுப்புராஜ் ‘டோரதி’ படத்தை இயக்கி வெளியிட்டிருப்பது தெரிய வந்தது. சம்பந்தப்பட்ட திரைப்பட இயக்குநர் மற்றும் தயாரிப்பு நிறுவனம் மீது சட்ட ரீதியாக நடவடிக்கை எடுக்க வேண்டும்” என தெரிவித்துள்ளார்.
இதுகுறித்து அவர் கூறுகையில், ‘டோரதி திரைப்படத்தின் இறுதிக்காட்சிகள் என் குறும்படத்துடன் ஒத்துப்போகின்றன. எனது குறும்படத்தில் நடித்த மதுரை பெண் ஒருவர் டோரதியிலும் நடித்துள்ளார். எனது கதைக்கான அங்கீகாரம் வேண்டும். போலீஸார் உரிய நடவடிக்கை எடுக்காவிட்டால் நீதிமன்றத்தை அணுகுவேன்’ என்று கூறினார்.
