மேற்கு இந்தியத் தீவுகள் அணிக்கு எதிரான 2-வது டெஸ்ட் போட்டியில் நியூஸிலாந்து அணி 9 விக்கெட்டுகள் வித்தியாசத்தில் வெற்றி பெற்றது.
நியூஸிலாந்து – மேற்கு இந்தியத் தீவுகள் அணிகள் இடையிலான 2-வது டெஸ்ட் கிரிக்கெட் போட்டி வெலிங்டனில் நடைபெற்று வருகிறது. இதன் முதல் இன்னிங்ஸில் மேற்கு இந்தியத் தீவுகள் அணி 205 ரன்களும், நியூஸிலாந்து அணி 278 ரன்களும் எடுத்தன.
73 ரன்கள் பின்தங்கிய நிலையில் 2-வது இன்னிங்ஸை விளையாடிய மேற்கு இந்தியத் தீவுகள் அணி 2-வது நாள் ஆட்டத்தின் முடிவில் 10 ஓவர்களில் 2 விக்கெட்கள் இழப்புக்கு 32 ரன்கள் எடுத்தது. பிரண்டன் கிங் 15, கவேம் ஹாட்ஜ் 3 ரன்களுடன் களத்தில் இருந்தனர்.
நேற்று 3-வது நாள் ஆட்டத்தை தொடர்ந்து விளையாடிய மேற்கு இந்தியத் தீவுகள் அணி 46.2 ஓவர்களில் 128 ரன்களுக்கு ஆட்டமிழந்தது. கவேம் ஹாட்ஜ் 35, பிரண்டன் கிங் 22, ஷாய் ஹோப் 5, கேப்டன் ராஸ்டன் சேஸ் 2, ஜஸ்டின் கிரீவ்ஸ் 25, டெவின் இம்லாக் 5, ஜெய்டன் சீல்ஸ் 0, ஓஜய் ஷீல்ட்ஸ் 9 ரன்களில் நடையை கட்டினர்.
நியூஸிலாந்து அணி தரப்பில் ஜேக்கப் டஃபி 5, மைக்கேல் ரே 3 விக்கெட்களை வீழ்த்தினர். 56 ரன்கள் இலக்குடன் பேட் செய்த நியூஸிலாந்து அணி 10 ஓவர்களில் ஒரு விக்கெட் இழப்புக்கு 57 ரன்கள் எடுத்து வெற்றி பெற்றது. கேப்டன் டாம் லேதம் 9 ரன்கள் எடுத்த நிலையில் ஆண்டர்சன் பிலிப் பந்தில் ஆட்டமிழந்தார்.
டேவன் கான்வே 28, கேன் வில்லியம்சன் 16 ரன்களுடன் ஆட்டமிழக்காமல் இருந்தனர். ஆட்ட நாயகனாக ஜேக்கப் டஃபி தேர்வானார். 9 விக்கெட்கள் வித்தியாசத்தில் வெற்றி பெற்ற நியூஸிலாந்து அணி 3 ஆட்டங்கள் கொண்ட டெஸ்ட் கிரிக்கெட் தொடரில் 1-0 என முன்னிலை வகிக்கிறது. கிறைஸ்ட்சர்ச்சில் நடைபெற்ற முதல் டெஸ்ட் போட்டி டிராவில் முடிவடைந்திருந்தது. கடைசி மற்றும் 3-வது டெஸ்ட் போட்டி வரும் 18-ம் தேதி மவுண்ட் மவுங்கனியில் உள்ள பே ஓவல் மைதானத்தில் தொடங்குகிறது.
