அமெரிக்காவின் ஜியார்ஜியா, அட்லாண்டா ஸ்டேடியத்தில் நேற்று நடைபெற்ற ஃபிபா உலகக்கோப்பை ஹெச் பிரிவு ஆட்டத்தில் நட்சத்திர வீரர்கள் கொண்ட ஐரோப்பிய சாம்பியன் ஸ்பெயின் அணியை 50 லட்சம் மக்கள் தொகையே கொண்ட உலகக் கோப்பை கால்பந்து தொடருக்கு தகுதி பெற்ற 3-வது சிறிய ஆப்பிரிக்க நாடான கேப் வெர்டே கால்பந்து அணி 0-0 என்று டிராவுக்குப் பணித்தது.
இதன் மூலம் அறிமுக உலகக் கோப்பை போட்டியிலேயே புள்ளிகள் பெற்று சாதனை படைத்தது கேப் வெர்டே. இதற்கு பிரதான காரணம் கேப் வெர்டே அணியின் 40 வயது கோல்கீப்பர் வோசின்ஹா தான் என்றால் மிகையாகாது. அவர்தான் நேற்று ஹீரோ. ஸ்பெயின் அணியின் 27 கோல் முயற்சியில் இலக்கை நோக்கிய ஷாட்கள் ஒன்று கூட கோலுக்குள் செல்ல முடியாமல் மதில் சுவாராய் நின்று காத்தார் வோசின்ஹா. ஆட்டத்தின் இறுதி விசில் அடிக்கப்பட்டவுடன் சாம்பியன் ஸ்பெயின் அணியுடன் 0-0 என்று டிரா என்ற ஸ்கோரைப் பார்த்து வோசின்ஹா உணர்ச்சி வயப்பட்டு கண்ணீர் விட்டார்.
ஸ்பெயின் அணிக்கு மேலும் அவமானமாகி இருக்க வேண்டிய விஷயமும் நடந்தது. அதாவது போட்டியைத் தோற்றிருக்கும். ஆட்டம் முடிவுத் தருணத்தை நெருங்கிக் கொண்டிருக்கையில் கேப் வெர்டே வீரர் டைனி போர்கேஸ் அடித்த கோல் நோக்கிய ஷாட்டை ஸ்பெயின் கோல் கீப்பர் உனய் சிமோன் தடுத்தார். இல்லையெனில் ஸ்பெயின் தோற்றே போயிருக்கும். உலகக் கோப்பையின் ஆகப்பெரிய ஷாக் ஆக அது மாறியிருக்கும்.
வெள்ளை நிற ஜெர்சியில் களமிறங்கிய கேப் வெர்டே வீரர்கள், தங்கள் கோல் பகுதியைச் சுற்றி உறுதியான பாதுகாப்பு அரணை அமைத்து ஸ்பெயினின் தொடர்ச்சியான தாக்குதல்களை முறியடித்தனர். போட்டி முடிவில் சிறப்பான ஆட்டத்தை வெளிப்படுத்திய வோசின்ஹா ஆட்ட நாயகனாக தேர்வு செய்யப்பட்டார்.
ஸ்பெயின் பயிற்சியாளர் லூயிஸ் டி லா ஃபுவென்டே, லமின் யாமல் மற்றும் நிகோ வில்லியம்ஸுக்கு தொடக்க அணியில் ஓய்வு அளித்தது தாக்குதல் வேகத்தை பாதித்தது. அவர்களுக்கு பதிலாக களமிறங்கிய பெர்ரான் டோரஸ் மற்றும் கேவியின் ஆட்டம் எதிர்பார்த்த தாக்கத்தை ஏற்படுத்தவில்லை.
ஆட்டத்தின் ஆரம்பத்தில் மார்க் குக்குரெல்லாவின் தொலைதூர ஷாட் கோலுக்கு சற்றே வெளியே சென்றது. பின்னர் மிகேல் ஒயர்சாபல் ஒரு சிறந்த வாய்ப்பை பயன்படுத்தத் தவறினார்.
அதன்பிறகு வோசின்ஹா தனது அசத்தலான தடுப்புகளால் ஸ்பெயினுக்கு போக்கு காட்டினார். 36-வது நிமிடத்தில் பெட்ரியின் ஷாட்டை தடுத்த அவர், மூன்று நிமிடங்கள் கழித்து பெர்ரான் டோரஸின் ஷாட் கம்பத்தில் பட்டு திரும்பியபோது, ஒயர்சாபலின் ஹெட்டரையும் ஒரே கையால் அபாரமாக தடுத்தார்.
முதல் பாதியின் இறுதியில் லபோர்ட்டின் ஹெட்டரையும் வோசின்ஹா சிறப்பாக தடுத்து கேப் வெர்டே அணியை காப்பாற்றினார்.
இரண்டாம் பாதியிலும் ஸ்பெயின் ஆதிக்கம் செலுத்தினாலும் கோல் அடிக்க முடியாமல் திணறியது. ஒயர்சாபல் நெருக்கமான வாய்ப்பை தவறவிட்டார்; ஃபேபியன் ரூயிஸின் இரண்டு முயற்சிகளும் இலக்கை அடையவில்லை.
70-வது நிமிடத்தில் களமிறங்கிய இளம் நட்சத்திரம் லமின் யாமல், ஸ்பெயின் தாக்குதலுக்கு புதிய வேகத்தை அளித்தார். அவரது வேகமான முன்னேற்றங்கள் கேப் வெர்டே தற்காப்புக்கு சவாலை ஏற்படுத்தின.
88-வது நிமிடத்தில் யாமல் கொடுத்த துல்லியமான பாஸை ஒயர்சாபல் கோலாக மாற்ற முயன்றார். ஆனால், கேப் வெர்டே வீரர்கள் கடைசி நொடியில் அதைத் தடுத்து நிறுத்தினர்.
கூடுதல் நேரத்தில் கேப் வெர்டே தனது ஒரே இலக்கை நோக்கிய முயற்சியைச் செய்தது. மேலும், இறுதி நிமிடங்களில் எதிர்தாக்குதல்களிலும் ஆபத்தை உருவாக்கியது. ஆனால், ஸ்பெயின் கோல் கீப்பரும் தயாராகவே இருந்தார். கோல் விழவில்லை.
இதன் மூலம் உலகக் கோப்பை அரங்கில் தனது முதல் போட்டியிலேயே கேப் வெர்டே, வலிமைமிக்க ஸ்பெயினை கோல் இன்றி தடுத்து கால்பந்து உலகின் கவனத்தை ஈர்த்துள்ளதோடு அறிமுக அணியின் சாதனைப் போட்டியாகவும் அமைந்தது.
