டாடா ஸ்டீல் மாஸ்டர்ஸ் செஸ் தொடர் நெதர்லாந்தின் விஜ்க் ஆன் ஸீ நகரில் நடைபெற்று வந்தது. இந்தத் தொடரின் கடைசி மற்றும் 13-வது சுற்று நேற்று நடைபெற்றது. இதில் உஸ்பெகிஸ்தானின் நோடிர்பெக் அப்துசட்டோரோவ், இந்திய கிராண்ட் மாஸ்டரான அர்ஜுன் எரிகைசியை வீழ்த்தினார். இதன் மூலம் 9 புள்ளிகளுடன் முதலிடம் பிடித்து நோடிர்பெக் அப்துசட்டோரோவ் சாம்பியன் பட்டம் வென்றார்.
உலக சாம்பியனான இந்தியாவின் டி.குகேஷ் தனது கடைசி சுற்றில் ஜெர்மனியின் வின்சென்ட் கீமருடன் டிரா செய்தார். இதன் மூலம் குகேஷ் 6.5 புள்ளிகளுடன் 8-வது இடத்தை நெதர்லாந்தின் அனிஷ் கிரி, சுலோவேனியாவின் விளாடிமிர் ஃபெடோசீவ் ஆகியோருடன் பகிர்ந்து கொண்டார்.
ஆர்.பிரக்ஞானந்தா 5.5 புள்ளிகளுடன் 11-வது இடத்தையும், அர்ஜுன் எரிகைசி, அரவிந்த் சிதம்பரம் ஆகியோர் தலா 4.5 புள்ளிகளுடன் முறையே 12, 13-வது இடத்தையும் பிடித்து ஏமாற்றம் அளித்தனர். இந்த தொடரில் வெளிப்படுத்திய மோசமான செயல் திறனால் குகேஷ், லைவ் ரேட்டிங்கில் 5.8 புள்ளிகளை இழந்து 2748.2 புள்ளிகளுடன் தரவரிசையில் 10-வது இடத்தில் உள்ளார்.
அதேவேளையில் அர்ஜுன் எரிகைசி 7 இடங்களை இழந்து 2745.1 புள்ளிகளுடன் 12-வது இடத்துக்கு தள்ளப்பட்டார். பிரக்ஞானந்தா 6 இடங்களை இழந்து 2741.2 புள்ளிகளுடன் 14-வது இடத்தில் உள்ளார்.
