திருமணம் தொடர்பான மோசடிகளைத் தடுக்கும் வகையில், வாடிக்கையாளர்களின் அடையாளத்தை ஆதார் அடிப்படையில் சரிபார்க்க ‘மேட்ரிமோனி’ நிறுவனத்துக்கு தமிழக அரசு அனுமதி வழங்கியுள்ளது.
இதுகுறித்து சமூகநலத் துறைச் செயலர் எம். பல்லவி பல்தேவ் வெளியிட்டுள்ள அரசிதழ் அறிக்கையில் கூறப்பட்டுள்ளதாவது: மேட்ரிமோனி நிறுவனத்தின் இணையதளத்தைப் பயன்படுத்தும் பயனர்களின் அடையாளத்தை உறுதி செய்து நம்பகத்தன்மையை அதிகரிக்கவும், ஆள்மாறாட்டத்தைத் தடுக்கவும், திருமணம் தொடர்பான மோசடிகளைக் கட்டுப்படுத்தவும் ஆதார் அங்கீகாரத்தைப் பயன்படுத்த அனுமதி அளிக்கப்பட்டுள்ளது.
பயனர்களின் சுயவிவரங்களில் ‘சரிபார்க்கப்பட்ட பயனர்’ என்பதைக் குறிக்கும் வகையில் ஆம்/இல்லை வசதியை அந்த நிறுவனம் பயன்படுத்திக் கொள்ளலாம்.
கட்டாயமில்லை
இந்த ஆதார் சரிபார்ப்பு முறை முழுவதும் தன்னார்வ அடிப்படையிலேயே மேற்கொள்ளப்பட வேண்டும். ஆதார் எண்ணைப் பயன்படுத்திச் சரிபார்ப்பை மேற்கொள்ளும் முன்பு, சம்பந்தப்பட்ட ஆதார் எண் வைத்திருப்பவரின் ஒப்புதலை மேட்ரிமோனி நிறுவனம் கட்டாயம் பெறவேண்டும்.
மேலும், ஆதார் சரிபார்ப்பை மறுக்கும் அல்லது செய்ய முடியாத பயனர்களுக்கு, மாற்று அடையாள ஆவணங்களை சமர்ப்பிக்கும் நடைமுறையை நிறுவனம் தெரிவிக்க வேண்டும். ஆதார் சரிபார்ப்பு செய்ய மறுப்பதால் எந்தவொரு பயனருக்கும் சேவையை நிறுவனம் மறுக்கக்கூடாது.
அதன்படி ஆதார் அட்டைக்கு மாற்றாக ஓட்டுநர் உரிமம், பாஸ்போர்ட், பான் அட்டை ஆகிய ஆவணங்களை வாடிக்கையாளர்கள் பயன்படுத்திக் கொள்ளலாம்.
இதற்காக மத்திய மின்னணு மற்றும் தகவல் தொழில்நுட்ப அமைச்சகம் இந்தியத் தனித்துவ அடையாள ஆணையத்துடன் கலந்தாலோசித்து, மேட்ரிமோனி நிறுவனத்தில் ஆதார் சரிபார்ப்பை மேற்கொள்ள அனுமதிப்பது தொடர்பாக தமிழக சமூக நலத்துறைக்குக் கடிதம் அனுப்பியிருந்தது.
அதன் அடிப்படையில் இந்த நடவடிக்கை மேற்கொள்ளப்பட்டுள்ளது. தமிழக அரசின் அரசிதழில் வெளியிடப்பட்ட நாளில் இருந்து இந்த அறிவிப்பு நடைமுறைக்கு வருகிறது. இவ்வாறு அதில் தெரிவிக்கப்பட்டுள்ளது.
