பிரபல யூடியூப்பரான ஹரி பாஸ்கர் நாயகனாக அறிமுகமாகும் படம், ‘மிஸ்டர். ஹவுஸ்கீப்பிங்’. இதில், லாஸ்லியா, பிக் பாஸ் ரயான், ஷா ரா, சித்ரா லட்சுமணன் உட்பட பலர் நடித்துள்ளனர். ஓஷோ வெங்கட் இசையமைத்துள்ளார்.
தேனாண்டாள் பிலிம்ஸ் சார்பில் முரளி ராமசாமி, இன்வேட் மீடியா சார்பில் நிதின் மனோகர் தயாரித்துள்ள இதை பி.வாசுவிடம் உதவி இயக்குநராகப் பணியாற்றிய அருண் ரவிச்சந்திரன் இயக்கியுள்ளார். வரும் 24-ம் தேதி வெளியாகும் இந்தப் படத்தின் செய்தியாளர்கள் சந்திப்பு சென்னையில் நடைபெற்றது.
படம் பற்றி அருண் ரவிச்சந்திரன் கூறும்போது, “நான் 12-வது படிக்கும் போது பாலாவின் ‘தாரை தப்பட்டை’ ஷூட்டிங் நடந்தது. வேடிக்கை பார்க்கப் போன நான், எனது தமிழ் உரையில் எழுத்து இயக்கம் என, என் பெயரை எழுதினேன். 10 வருடத்தில் இந்த இடத்துக்கு வந்திருப்பதில் மகிழ்ச்சி. தயாரிப்பாளர் முரளி சாரிடம் இந்தக் கதையை சொன்னபோது, அவர் அமைதியாக இருந்தார். எனக்கு நம்பிக்கையே இல்லை. அடுத்த ஐந்து நிமிடத்தில் இந்தப் படத்தை நாம் செய்யலாம் என்று சொன்னார். இவ்வளவு பெரிய வாய்ப்பைத் தந்ததற்கு நன்றி.
லாஸ்லியா இந்த கேரக்டருக்கு பொருத்தமாக இருப்பார் என அவரைத் தேர்வு செய்தோம். இளவரசு இந்தப் படத்துக்குக் கிடைத்த பெரிய கிஃப்ட். முழுக்க ரசிகர்களைச் சிரிக்க வைக்க வேண்டும் என்ற நோக்கத்தில் இந்தப் படத்தை கமர்ஷியலாக உருவாக்கி இருக்கிறோம். இந்தக் கால டிரெண்ட்டுக்கு ஏற்பவும் குடும்பங்கள் ரசிக்கும் படமாகவும் இது இருக்கும்” என்றார்.
