திருப்பதி ஏழுமலையான் கோயில் நிர்வாகத்தில் உள்ள குறை, நிறைகள் குறித்து பக்தர்களிடம் திருமலை திருப்பதி தேவஸ்தானம் கேட்டு வருகிறது.
ஆந்திர மாநிலத்தில் உள்ள அனைத்து முக்கிய கோயில்களிலும் பக்தர்களுக்கு வேண்டிய வசதிகள் உள்ளனவா என்பது குறித்து கோயில் நிர்வாகத்தினர் பக்தர்களிடையே கருத்துகளை கேட்டு வருகின்றனர்.
இதன் அடிப்படையில் நிறை, குறைகளை ஆராய்ந்து சரி செய்ய வேண்டுமென முதல்வர் சந்திரபாபு நாயுடு உத்தரவிட்டுள்ளார்.
இந்நிலையில், நேற்று முதல் திருமலை திருப்பதி தேவஸ்தானம் ஸ்ரீவாரி சேவகர்கள் மூலம் திருமலைக்கு வரும் பக்தர்களிடம் நேரடியாக கேள்விகளை கேட்டு கருத்துக்களை சேகரித்து வருகின்றனர்.
தரிசனம், ஆர்ஜித சேவைகள், கல்யாண கட்டா, அன்னதானம், பிரசாதம், தங்கும் விடுதிகள், போக்குவரத்து, தேவஸ்தான ஊழியர்கள் நடந்து கொள்ளும் முறை, லக்கேஜ் மைய வசதி, தனியார் ஓட்டல்களில் உள்ள விலைப்பட்டியல் போன்றவை குறித்து மொத்தம் 17 கேள்விகள் பக்தர்களிடம் கேட்கப்படுகின்றன.
