மேற்கு இந்தியத் தீவுகள் அணிக்கு எதிரான கடைசி மற்றும் 3-வது டெஸ்ட் கிரிக்கெட் போட்டியின் முதல் நாள் ஆட்டத்தில் நியூஸிலாந்து அணி ஒரு விக்கெட் இழப்புக்கு 334 ரன்கள் குவித்து மிரட்டியது. டாம் லேதம், டேவன் கான்வே சதம் விளாசினர்.
மவுண்ட் மவுங்கனியில் உள்ள பே ஓவல் மைதானத்தில் நேற்று தொடங்கிய இந்த டெஸ்ட் போட்டியில் டாஸ் வென்ற நியூஸிலாந்து அணி பேட்டிங்கை தேர்வு செய்தது. தொடக்க வீரர்களான கேப்டன் டாம் லேதம், டேவன் கான்வே ஜோடி எந்தவித சிரமமும் இல்லாமல் மேற்கு இந்தியத் தீவுகள் அணியின் பந்து வீச்சை நிதானமாக எதிர்கொண்டு ரன்கள் சேர்த்தனர்.
டாம் லேதம் 183 பந்துகளில், ஒரு சிக்ஸர், 9 பவுண்டரிகளுடன் தனது 15-வது சதத்தை கடந்தார். அதேவேளையில் டேவன் கான்வே 147 பந்துகளில், 17 பவுண்டரிகளுடன் தனது 6-வது சதத்தை விளாசினார். மேற்கு இந்தியத் தீவுகள் அணியின் பந்துவீச்சாளர்களுக்கு கடும் அழுத்தம் கொடுத்த இந்த ஜோடி 86.4-வது ஓவரில்தான் பிரிந்தது.
டாம் லேதம் 246 பந்துகளில், ஒரு சிக்ஸர், 15 பவுண்டரிகளுடன் 137 ரன்கள் எடுத்த நிலையில் கேமர் ரோச் பந்தில் சிலிப் திசையில் நின்ற ராஸ்டன் சேஸிடம் கேட்ச் கொடுத்து ஆட்டமிழந்தார். டாம் லேதம், டேவன் கான்வே ஜோடி முதல் விக்கெட்டுக்கு 323 ரன்கள் குவித்தது. இதையடுத்து ஜேக்கப் டஃபி களமிறங்கினார்.
முதல் நாள் ஆட்டத்தின் முடிவில் நியூஸிலாந்து அணி 90 ஓவர்களில் ஒரு விக்கெட் இழப்புக்கு 334 ரன்கள் குவித்தது. டேவன் கான்வே 279 பந்துகளில், 25 பவுண்டரிகளுடன் 178 ரன்களும், ஜேக்கப் டஃபி 9 ரன்களும் சேர்த்து களத்தில் இருந்தனர்.
கைவசம் 9 விக்கெட்கள் இருக்க இன்று 2-வது நாள் ஆட்டத்தை தொடர்ந்தது நியூஸிலாந்து அணி. இரண்டாம் நாளின் தேநீர் நேர் இடைவேளையின் பொது 6 விக்கெட் இழப்புக்கு 508 ரன்கள் எடுத்துள்ளது. டஃபி 17, கேன் வில்லியம்சன் 31 ரன்களில் வெளியேறினர். 367 பந்துகளில் 227 ரன்கள் எடுத்து ஆட்டமிழந்தார் கான்வே. தொடர்ந்து மிட்செல் மற்றும் டாம் பிளெண்டல் ஆகியோரும் சொற்ப ரன்களில் விக்கெட்டை இழந்தனர்.
இரண்டாம் நாள் தேநீர் நேர இடைவேளையின் போது நியூஸிலாந்து அணி 6 விக்கெட் இழப்புக்கு 508 ரன்கள் எடுத்துள்ளது. ரச்சின் ரவீந்திரா 38 மற்றும் கிளீன் பிலிப்ஸ் 28 ரன்கள் உடன் களத்தில் உள்ளனர்.
