முரசொலி அறக்கட்டளை நிர்வாகம் சட்டவிரோத நடவடிக்கைகளில் ஈடுபட்டதாக குற்றம்சாட்டி தொடரப்பட்ட வழக்கில் சிபிஐ, தேசிய தாழ்த்தப்பட்டோர் ஆணையம் தரப்பில் பதில் அளிக்க உயர் நீதிமன்றம் உத்தரவிட்டுள்ளது.
நெல்லையைச் சேர்ந்த வழக்கறிஞர் வெங்கடாஜலபதி சென்னை உயர் நீதிமன்றத்தில் தாக்கல் செய்த மனுவில் கூறியுள்ளதாவது: முரசொலி அறக்கட்டளையின் அலுவலகம் பஞ்சமி நிலத்தை ஆக்கிரமித்து கட்டப்பட்டதாக ஏற்கெனவே குற்றச்சாட்டுகள் உள்ளன.
இந்த நிலையில், ஆளுங்கட்சியின் அதிகார பலத்துடன் சட்டவிரோத நடவடிக்கைகளிலும் அறக்கட்டளை நிர்வாகம் ஈடுபட்டுள்ளது. அதற்கு சொந்தமான பல கோடி ரூபாய் பணம், விளம்பரம் என்ற கணக்கில் சட்டவிரோதமாக செலவிடப்பட்டுள்ளது.
இதுகுறித்து சிபிஐ விசாரணைக்கு உத்தரவிட வேண்டும். இவ்வாறு அதில் கூறப்பட்டிருந்தது. தலைமை நீதிபதி எஸ்.ஏ.தர்மாதிகாரி, நீதிபதி ஜி.அருள்முருகன் அமர்வில் இந்த மனு விசாரணைக்கு வந்தது.
அப்போது, மனுதாரர் தரப்பில் ஆஜரான மூத்த வழக்கறிஞர் தாமா சேஷாத்ரி நாயுடு, “முரசொலி அறக்கட்டளையின் சட்டவிரோத நடவடிக்கைகள் குறித்து சிபிஐ விசாரணைக்கு உத்தரவிட வேண்டும்” என்றார்.
முரசொலி அறக்கட்டளை தரப்பில் ஆஜரான மூத்த வழக்கறிஞர் பி.வில்சன், “மத்திய இணை அமைச்சர் எல்.முருகன் ஏற்கெனவே தேசிய தாழ்த்தப்பட்டோர் ஆணையத்தின் துணைத் தலைவராக இருந்தபோது, அவரது தூண்டுதலின்பேரில்தான் முரசொலி அறக்கட்டளை அலுவலகம் பஞ்சமி நிலத்தில் இருப்பதாக பொய் புகார் அளிக்கப்பட்டது.
ஆனால், அது பஞ்சமி நிலம் அல்ல என்பதற்கான அனைத்து ஆதாரங்களையும், சம்பந்தப்பட்ட ஆணையத்தின் முன்பு நடந்த விசாரணையில் சமர்ப்பித்துள்ளோம்.
தவிர, பொதுநல வழக்கு என்ற பெயரில் இந்த வழக்கை தொடர்ந்துள்ள வழக்கறிஞர் வெங்கடாஜலபதி நெல்லை மாவட்ட பாஜக நிர்வாகி. அந்த உண்மையை மறைத்து அரசியல் உள்நோக்கத்துடன் வழக்கு தொடர்ந்துள்ளார்.
எனவே, இந்த வழக்கை அபராதத்துடன் தள்ளுபடி செய்ய வேண்டும்” என்று வாதிட்டார். இதையடுத்து, மனுதாரரின் குற்றச்சாட்டு குறித்து சிபிஐ, தேசிய தாழ்த்தப்பட்டோர் ஆணையம், முரசொலி அறக்கட்டளை தரப்பில் 2 வாரங்களில் பதில் அளிக்க உத்தரவிட்டு விசாரணையை நீதிபதிகள் தள்ளிவைத்தனர்.
