அறிமுக இயக்குநர் பி.நாராயணன் இயக்கியுள்ள அனிமேஷன் படம், ‘கிகி அண்ட் கொகொ’. இனிகா புரொடக் ஷன்ஸ் வழங்கும் குழந்தைகளுக்கான இந்தியாவின் முதல் அனிமேஷன் படம் இது. இந்தப் படத்தின் டீஸர் வெளியீட்டு விழா சென்னையில் நடைபெற்றது.
விழாவில் இயக்குநர் நாராயணன் பேசும்போது, “ஸ்பைடர்மேன் பறப்பது, ஹீமேன் அடிப்பது என நிஜத்தில் நடக்காத பல ஃபேன்டசி விஷயங்களைத்தான் குழந்தைகளுக்கு சினிமாவில் அறிமுகப்படுத்து கிறோம். நடைமுறையில் என்ன நடக்கிறது என்பதை இந்தப் படத்தில் காட்டியுள்ளோம். யாரையும் அடிக்கப் போவதில்லை, யாரும் பறக்கப் போவதில்லை. நாம் சராசரி மனிதனாக இருக்கும்போது யாருக்காவது உதவுகிறோம், சிரிக்கிறோம், நன்றியை நினைத்துப் பார்க்கிறோம், அன்பாக இருக்கிறோம்.
இந்த நடைமுறை விஷயங்களைப் படத்தில் பேசியிருக்கிறோம். நம் குழந்தைகளுக்கு நாம் கொடுக்கும் மிகப்பெரிய சொத்தே அவர்கள் குணம்தான். எல்லோரையும் அன்பாக வைத்திருங்கள், அன்பு உங்களுக்குத் திரும்பக் கிடைக்கும்” என்றார். படக்குழுவினர் கலந்துகொண்டனர்.
