ஆஸ்திரேலிய அணிக்கு எதிரான ஆஷஸ் கிரிக்கெட் தொடரின் 3-வது டெஸ்ட் போட்டியின் முதல் இன்னிங்ஸில் இங்கிலாந்து அணி 286 ரன்களுக்கு ஆல் அவுட் ஆனது.
அடிலெய்டில் நடைபெற்று வரும் இந்த டெஸ்ட் போட்டியில் டாஸ் வென்று பேட் செய்த ஆஸ்திரேலிய அணி முதல் நாள் ஆட்டத்தின் முடிவில் 83 ஓவர்களில் 8 விக்கெட்கள் இழப்புக்கு 326 ரன்கள் குவித்தது. அதிகபட்சமாக அலெக்ஸ் கேரி 109, உஸ்மான் கவாஜா 82 ரன்கள் சேர்த்தனர். மிட்செல் ஸ்டார்க் 33 ரன்களும், நேதன் லயன் ரன் ஏதும் சேர்க்காமல் களத்தில் இருந்தனர். நேற்று 2-வது நாள் ஆட்டத்தை ஆஸ்திரேலிய அணி தொடர்ந்து விளையாடியது. தனது 13-வது அரை சதத்தை கடந்த மிட்செல் ஸ்டார்க் 75 பந்துகளில், 9 பவுண்டரிகளுடன் 54 ரன்கள் எடுத்த நிலையில் ஜோப்ரா ஆர்ச்சர் பந்தில் போல்டானார். இதைத் தொடர்ந்து நேதன் லயன் 9 ரன்களில் ஜோப்ரா ஆர்ச்சர் பந்தில் எல்பிடபிள்யூ முறையில் வெளியேற ஆஸ்திரேலிய அணி 91.2 ஓவர்களில் 371 ரன்கள் குவித்து ஆட்டமிழந்தது.
ஸ்காட் போலண்ட் 14 ரன்களுடன் களத்தில் இருந்தார். இங்கிலாந்து அணி தரப்பில் ஜோப்ரா ஆர்ச்சர் 5 விக்கெட்களை வீழ்த்தினார். பிரைடன் கார்ஸ், வில் ஜேக்ஸ் ஆகியோர் தலா 2 விக்கெட்களையும், ஜோஷ் டங் ஒரு விக்கெட்டையும் கைப்பற்றினர்.
இதையடுத்து பேட் செய்த இங்கிலாந்து அணி சீரான இடைவெளியில் விக்கெட்களை பறிகொடுத்தது. ஸாக் கிராவ்லி 9 ரன்கள் எடுத்த நிலையில் பாட் கம்மின்ஸ் பந்தில் விக்கெட் கீப்பர் அலெக்ஸ் கேரியிடம் கேட்ச் கொடுத்து ஆட்டமிழந்தார். 10-வது ஓவரை வீசிய நேதன் லயன் 2 விக்கெட்களை வீழ்த்தி நெருக்கடி கொடுத்தார். அவரது சுழலில் ஆலி போப் 3 ரன்களில் மிட்விக்கெட் திசையில் ஜோஷ் இங்லிஷிடம் பிடிகொடுத்து நடையை கட்டினார். தொடர்ந்து பென் டக்கெட் 30 பந்துகளில், 5 பவுண்டரிகளுடன் 29 ரன்கள் எடுத்த நிலையில் போல்டானார்.
சீனியர் பேட்ஸ்மேனான ஜோ ரூட் 19 ரன்களில் தனது விக்கெட்டை பாட் கம்மின்ஸிடம் எளிதாக பறிகொடுத்தார். அதிரடியாக விளையாட முயன்ற ஹாரி புரூக் 63 பந்துகளில், ஒரு சிக்ஸர், 2 பவுண்டரிகளுடன் 45 ரன்கள் எடுத்த நிலையில் கேமரூன் கிரீன் பந்தில் அலெக்ஸ் கேரியிடம் கேட்ச் கொடுத்து வெளியேறினார். இதன் பின்னர் ஜேமி ஸ்மித் 22 ரன்கள் எடுத்த நிலையில் கம்மின்ஸ் பந்தில் ஆட்டமிழந்தார்.
இதையடுத்து களமிறங்கிய வில் ஜேக்ஸ் 6 ரன்களிலும், பிரைடன் கார்ஸ் ரன் ஏதும் எடுக்காமலும் ஸ்காட் போலண்ட் பந்தில் நடையை கட்டினர். ஒரு முனையில் விக்கெட்கள் சரிந்த போதிலும் மறுமுனையில் கேப்டன் பென் ஸ்டோக்ஸ் நிலைத்து நின்று விளையாடினார். அவருக்கு உறுதுணையாக ஜோப்ரா ஆர்ச்சர் சீராக ரன்கள் சேர்த்தார்.
2-வது நாள் ஆட்டத்தின் முடிவில் இங்கிலாந்து அணி 68 ஓவர்களில் 8 விக்கெட்கள் இழப்புக்கு 213 ரன்கள் எடுத்தது. பென் ஸ்டோக்ஸ் 151 பந்துகளில், 3 பவுண்டரிகளுடன் 45 ரன்களும், ஜோப்ரா ஆர்ச்சர் 48 பந்துகளில், 4 பவுண்டரிகளுடன் 30 ரன்களும் சேர்த்து ஆட்டமிழக்காமல் இருந்தனர்.
கைவசம் 2 விக்கெட்கள் மட்டுமே இருக்க 158 ரன்கள் பின்தங்கியுள்ள இங்கிலாந்து அணி இன்று 3-வது நாள் ஆட்டத்தை தொடர்ந்தது. இங்கிலாந்து கேப்டன் பென் ஸ்டோக்ஸ் 83 ரன் எடுத்து ஆட்டமிழந்தார். அவர் 8 பவுண்டரிகளை விளாசி இருந்தார். டெஸ்ட் கிரிக்கெட்டில் தனது முதல் அரை சதத்தை பதிவு செய்த ஆர்ச்சர், 51 ரன்களில் வெளியேறினார். 87.2 ஓவர்களில் 286 ரன்களுக்கு இங்கிலாந்து ஆட்டமிழந்தது. 8 விக்கெட் இழப்புக்கு 168 ரன்கள் என்ற நிலையில் இங்கிலாந்து இருந்தது. அப்போது ஜோடி சேர்ந்த ஸ்டோக்ஸ் மற்றும் ஆர்ச்சர் இணைந்து 9-வது விக்கெட்டுக்கு 106 ரன் பார்ட்னர்ஷிப் அமைத்தனர்.
ஆஸ்திரேலிய அணி தரப்பில் பாட் கம்மின்ஸ் தலா, ஸ்காட் போலண்ட் தலா 3 விக்கெட்களை வீழ்த்தினர். நேதன் லயன் 2 விக்கெட்களையும், கேமரூன் கிரீன் மற்றும் ஸ்டார்க் ஒரு விக்கெட்டையும் கைப்பற்றினர்.
மூன்றாம் நாள் ஆட்ட மதிய உணவு நேர இடைவேளையின் போது ஆஸ்திரேலிய அணி இந்த ஆட்டத்தில் 102 ரன்கள் முன்னிலை பெற்றுள்ளது. 2-வது இன்னிங்ஸில் 5 ஓவர்களில், 1 விக்கெட் இழப்புக்கு 17 ரன்கள் எடுத்துள்ளது அந்த அணி.
மெக்ராத் சாதனையை முயறிடித்த லயன்: அடிலெய்டு டெஸ்ட் போட்டியின் 2-வது நாள் ஆட்டத்தில் ஆஸ்திரேலிய அணியின் சுழற்பந்து வீச்சாளரான நேதன் லயன் 2 விக்கெட்களை (ஆலி போப், பென் டக்கெட்) வீழ்த்தினார். இதன் மூலம் டெஸ்ட் கிரிக்கெட்டில் அதிக விக்கெட்களை வீழ்த்திய ஆஸ்திரேலிய வீரர்களின் பட்டியலில் கிளென் மெக்ராத்தை (563) பின்னுக்குத்தள்ளி 2-வது இடத்துக்கு முன்னேறினார் நேதன் லயன். 125 டெஸ்ட் போட்டிகளில் விளையாடி உள்ள நேதன் லயன் 564 விக்கெட்களை வீழ்த்தி உள்ளார். இந்த வகை சாதனையில் ஆஸ்திரேலிய வீரர்களில் மறைந்த முன்னாள் வீரர் ஷேன் வார்ன் (708) முதலிடத்தில் உள்ளார்.
நாற்காலியுடன் பாய்ந்த மெக்ராத்: அடிலெய்டு டெஸ்ட் போட்டியின் 2-வது நாள் ஆட்டத்தில் ஆஸ்திரேலிய அணியின் சுழற்பந்து வீச்சாளரனா நேதன் லயன் 2 விக்கெட்களை வீழ்த்தினார். இதன் மூலம் டெஸ்ட் கிரிக்கெட்டில் அதிக விக்கெட்கள் வீழ்த்திய ஆஸ்திரேலிய அணியின் வீரர்களில் கிளென் மெக்ராத்தை பின்னுக்குத்தள்ளி 2-வது இடத்தைப் பிடித்தார். இதை போட்டியை நேரடி வர்ணனை செய்தபடி பார்த்துக் கொண்டிருந்த கிளென் மெக்ராத் சிரித்தபடியே செல்ல கோபத்துடன் அருகில் இருந்த நாற்காலியை தூக்கி எறிவது போன்று செய்கை செய்தார். இதுதொடர்பான காட்சிகள் சமூக வலைதளத்தில் வைரலாகி வருகின்றன.
மீண்டும் சர்ச்சை: அடிலெய்டு டெஸ்ட் போட்டியில் ஸ்னிக்கோ மீட்டர் சர்ச்சை தொடர்ந்தவாறு உள்ளது. முதல் போட்டியில் ஆஸ்திரேலிய அணியின் பேட்ஸ்மேன் அலெக்ஸ் கேரியின் மட்டையில் பந்து உரசி கேட்ச் ஆனது. ஆனால் ஸ்னிக்கோ மீட்டரில் பந்து மட்டையில் பட்டதற்கான ஆதாரம் இல்லையென அவுட் கொடுக்க மறுக்கப்பட்டது. இந்நிலையில் நேற்று இங்கிலாந்து அணியின் ஜேமி ஸ்மித், பாட் கம்மின்ஸ் பவுன்ஸரை எதிர்கொண்ட போது பந்து கையுறையில் பட்டு சிலிப் திசையில் உஸ்மான் கவாஜாவிடம் கேட்ச் ஆனது. ஆனால் ஸ்னிக்கோ மீட்டரில் பந்து பேட்ஸ்மேனுடன் எந்தவித தொடர்பும் இல்லாமல் இருப்பது போன்று காண்பித்தது. ஆனால் அடுத்த சில ஓவர்களில் கம்மின்ஸ் பந்தில் ஜேமி ஸ்மித் ஆட்டமிழந்தார். ஆனால் இம்முறை பந்து மட்டையில் உரசவில்லை. ஆனால் ஸ்னிக்கோ மீட்டரில் பந்து மட்டையில் உரசியதாக காண்பித்ததால் ஜேமி ஸ்மித் விரக்தியுடன் வெளியேறினார்.
