பருவமழையால் பாதிப்பு ஏற்படாத வகையில், மெட்ரோ திட்டப்பணிகள் நடைபெறும் இடங்களில் தேவையான முன்னெச்சரிக்கை எடுக்கப்பட்டுள்ளதாக சென்னை மெட்ரோ ரயில் நிறுவன அதிகாரிகள் தெரிவித்துள்ளனர்.
இது குறித்து சென்னை மெட்ரோ ரயில் நிறுவன அதிகாரிகள் கூறியதாவது: வரவிருக்கும் பருவமழை காலத்தை எதிர்கொள்வதற்காக, சென்னை மெட்ரோ ரயில் நிறுவனம், பெருநகர சென்னை மாநகராட்சி, நெடுஞ்சாலைத்துறை மற்றும் தமிழக சாலை மேம்பாட்டு நிறுவனம் ஆகியவற்றுடன் இணைந்து தீவிர முன்னெச்சரிக்கை பணிகளை மேற்கொண்டு வருகிறது.
இரண்டாம் கட்ட மெட்ரோ ரயில் திட்டத்தில் அனைத்து வழித்தடங்களிலும் முன்னெச்சரிக்கை நடவடிக்கை எடுக்கப்பட்டுள்ளது.
நீர் இறைக்கும் பம்புகள்
மில்லர்ஸ் சாலை, ஸ்டெர்லிங் சாலை, ஆண்டர்சன் சாலை, ஆற்காடு சாலை (போரூர் சந்திப்பு), சாஸ்திரி நகர், வில்லிவாக்கம், பெரம்பூர் (டேங்க் லிங்க் சாலை), மவுண்ட் பூந்தமல்லி சாலை மற்றும் இந்திரா நகர் உள்ளிட்ட மெட்ரோ திட்டத்தின் மூன்று வழித்தடங்களிலும், வெள்ளப் பாதிப்பு ஏற்பட வாய்ப்புள்ளதாகக் கண்டறியப்பட்ட இடங்களில் போதுமான திறன் கொண்ட நீர் இறைக்கும் பம்புகள் நிறுத்தப்பட்டுள்ளன.
ஒக்கியம் மடுவு பகுதியில் உள்ள ஒட்டுமொத்த 98 மீட்டர் நீளப் பகுதியும் முழுமையாகச் சுத்தம் செய்யப்பட்டுள்ளது. இதன் மூலம் மழைநீர் எவ்வித தடையுமின்றி சீராக வெளியேறுவது உறுதி செய்யப்பட்டு, அப்பகுதியில் வெள்ள பாதிப்புகள் தடுக்க நடவடிக்கை மேற்கொள்ளப்பட்டுள்ளது. இவ்வாறு அவர்கள் கூறினர்.
