Home » விளையாட்டுச்செய்திகள் » முஷ்டாக் அலி 20 ஓவர் கிரிக்கெட்: அசாமை பந்தாடியது தமிழக அணி
202101130407079525_Mushtaq-Ali-20-over-cricket-Assam-bowled-by-Tamil-Nadu-team_SECVPF

முஷ்டாக் அலி 20 ஓவர் கிரிக்கெட்: அசாமை பந்தாடியது தமிழக அணி

12-வது சையத் முஷ்டாக் அலி கோப்பைக்கான 20 ஓவர் கிரிக்கெட் போட்டி இந்தியாவில் 6 நகரங்களில் நடந்து வருகிறது. இதில் பங்கேற்றுள்ள 38 அணிகள் 6 பிரிவுகளாக பிரிக்கப்பட்டு லீக்கில் மோதி வருகின்றன.

பெங்களூருவில் நேற்று நடந்த ‘ஏ’ பிரிவு லீக் ஆட்டம் ஒன்றில் நடப்பு சாம்பியன் கர்நாடக அணி, பஞ்சாப்பை எதிர்கொண்டது. முதலில் பேட் செய்த கர்நாடக அணி, பஞ்சாப் வீரர்களின் அபார பந்து வீச்சை தாக்குப்பிடிக்க முடியாமல் திணறியது. 20 ஓவர்களில் கர்நாடக அணி 8 விக்கெட்டுக்கு 125 ரன்களுக்கு கட்டுப்படுத்தப்பட்டது. தேவ்தத் படிக்கல் 19 ரன்னிலும், கருண்நாயர் 13 ரன்னிலும் ஆட்டம் இழந்து ஏமாற்றம் அளித்தனர். பஞ்சாப் தரப்பில் வேகப்பந்து வீச்சாளர் சித்தார்த் கவுல் 26 ரன்கள் கொடுத்து 4 விக்கெட்டுகள் வீழ்த்தினார். இதில் 17-வது ஓவரில் ‘ஹாட்ரிக்’ விக்கெட்டுகள் அள்ளியதும் அடங்கும்.

பின்னர் ஆடிய பஞ்சாப் அணி 14.4 ஓவர்களில் ஒரு விக்கெட்டுக்கு 127 ரன்கள் எடுத்து 9 விக்கெட் வித்தியாசத்தில் வெற்றி பெற்றது. பஞ்சாப் அணி தொடர்ச்சியாக பெற்ற 2-வது வெற்றி இதுவாகும். கர்நாடக அணிக்கு இது முதல் தோல்வியாகும்.

கொல்கத்தாவில் அரங்கேறிய ‘பி’ பிரிவு ஆட்டம் ஒன்றில் பெங்கால் அணி 16 ரன்கள் வித்தியாசத்தில் ஜார்கண்ட் அணியை வீழ்த்தி 2-வது வெற்றியை பெற்றது.. முதலில் ஆடிய பெங்கால் 6 விக்கெட்டுக்கு 161 ரன்கள் எடுத்தது. தொடக்க வீரர் விவேக் சிங் 64 பந்துகளில் 13 பவுண்டரி, 3 சிக்சருடன் 100 ரன்கள் குவித்து ஆட்டம் இழக்காமல் இருந்தார். அடுத்து ஆடிய ஜார்கண்ட் அணி 9 விக்கெட்டுக்கு 145 ரன்கள் எடுத்து அடங்கி 2-வது தோல்வியை சந்தித்தது.

இதே பிரிவில் நடந்த மற்றொரு லீக் ஆட்டத்தில் தமிழக அணி 10 விக்கெட் வித்தியாசத்தில் அசாமை துவசம் செய்து 2-வது வெற்றியை தனதாக்கியது. இதில் முதலில் ஆடிய அசாம் 7 விக்கெட்டுக்கு 126 ரன்கள் எடுத்தது. பின்னர் ஆடிய தமிழக அணி 15 ஓவர்களில் விக்கெட் இழப்பின்றி 128 ரன்கள் சேர்த்து அசத்தியது. ஹரி நிஷாந்த் 47 ரன்களும் (40 பந்து, 5 பவுண்டரி, ஒரு சிக்சர்), ஜெகதீசன் 78 ரன்களும் (50 பந்து, 8 பவுண்டரி, 3 சிக்சர்) விளாசினர்.