Templates by BIGtheme NET
Sasikala-was-again-imprisoned

5 நாள் ‘பரோல்’ முடிவடைந்தது சசிகலா, மீண்டும் சிறையில் அடைக்கப்பட்டார்

பெங்களூரு,

சொத்து குவிப்பு வழக்கில் தலா 4 ஆண்டுகள் சிறை தண்டனை விதிக்கப்பட்டதை அடுத்து அ.தி.மு.க.(அம்மா) அணி பொதுச் செயலாளர் சசிகலா, இளவரசி, சுதாகரன் ஆகியோர் பெங்களூரு பரப்பனஅக்ரஹாரா சிறையில் அடைக்கப்பட்டனர்.

சசிகலாவின் கணவர் நடராஜன் சிறுநீரகம், கல்லீரல் பாதிப்பால் சென்னையில் உள்ள ஒரு தனியார் மருத்துவமனையில் அனுமதிக்கப்பட்டுள்ளார். அங்கு அவருக்கு உறுப்பு மாற்று அறுவை சிகிச்சை செய்யப்பட்டுள்ளது.

தனது கணவரை பார்க்க ‘பரோல்’ வழங்குமாறு சசிகலா சார்பில் பெங்களூரு சிறை அதிகாரிகளிடம் மனு வழங்கப்பட்டது.

அதை ஏற்றுக்கொண்ட சிறை அதிகாரிகள், கடந்த 6-ந் தேதி சசிகலாவுக்கு 7-ந் தேதி முதல் 11-ந் தேதி வரை 5 நாட்கள் அவசர ‘பரோல்’ வழங்கி உத்தரவிட்டனர். 12-ந் தேதி(அதாவது நேற்று) மாலை 5 மணிக்குள் சிறைக்கு திரும்ப வேண்டும் என்று சிறை அதிகாரிகள் அவருக்கு உத்தரவிட்டு இருந்தனர்.

சிறைக்கு திரும்பினார்

இதைத்தொடர்ந்து சென்னை சென்ற சசிகலா, சிறை அதிகாரிகளிடம் கொடுத்த முகவரியின்படி தியாகராயநகரில் உள்ள இளவரசியின் மகள் கிருஷ்ணப்பிரியாவின் வீட்டில் தங்கி இருந்தார். இந்த நாட்களில் மருத்துவமனைக்கு சென்று தனது கணவர் நடராஜனை பார்த்து கவனித்து கொண்டார். இந்த நிலையில் 5 நாள் ‘பரோல்’ காலம் நேற்று முன்தினத்துடன் முடிவடைந்ததை அடுத்து, சிறை அதிகாரிகள் விதித்த காலக்கெடுவின்படி சசிகலா நேற்று மாலை கார் மூலம் பெங்களூரு பரப்பனஅக்ரஹாரா சிறைக்கு சென்றார்.

அவருடைய கார் பிரதான நுழைவு வாயில் வரை சென்றது. அந்த காரில் இருந்து இறங்கிய அவர் சரியாக 4.30 மணிக்கு நேராக சிறைக்குள் சென்றுவிட்டார்.

சசிகலாவின் கார் சிறை வளாகத்திற்குள் நுழைந்தபோது அவரை படம் பிடிக்க காட்சி ஊடகத்தினர் மற்றும் புகைப்பட கலைஞர்கள் முண்டியடித்தனர். அவர்களை போலீசார் கட்டுப்படுத்தினர். இதனால் அங்கு லேசான தள்ளுமுள்ளு உண்டானது.

Leave a Reply

Your email address will not be published. Required fields are marked *

*