Templates by BIGtheme NET
Home » விளையாட்டுச்செய்திகள் » விஜய் ஹசாரே கோப்பை கிரிக்கெட் ஆந்திரா அணி 5-வது வெற்றி
Vijay-Hazare-Cup-Cricket-Andhra-team-win-5th

விஜய் ஹசாரே கோப்பை கிரிக்கெட் ஆந்திரா அணி 5-வது வெற்றி

சென்னை,

விஜய் ஹசாரே கோப்பை கிரிக்கெட் போட்டி பல்வேறு இடங்களில் நடந்து வருகிறது. இதில் ‘சி’ பிரிவு லீக் ஆட்டங்கள் சென்னையில் நடைபெற்று வருகிறது.

இதில் முருகப்பா மைதானத்தில் நேற்று நடந்த லீக் ஆட்டம் ஒன்றில் ஆந்திரா-குஜராத் அணிகள் மோதின. முதலில் பேட்டிங் செய்த குஜராத் அணி 50 ஓவர்களில் 250 ரன்கள் எடுத்து ஆல்-அவுட் ஆனது. அதிகபட்சமாக ருஜூல் பாத் 74 ரன்னும், பியுஷ் சாவ்லா 56 ரன்னும், பார்த்தீவ் பட்டேல் 39 ரன்னும் எடுத்தனர். குஜராத் அணி தரப்பில் கார்த்திக் ராமன் 4 விக்கெட்டும், அய்யப்பா, நரேன் ரெட்டி தலா 2 விக்கெட்டும் கைப்பற்றினார்கள்.

பின்னர் ஆடிய ஆந்திரா அணி 45.2 ஓவர்களில் ஒரு விக்கெட் இழப்புக்கு 251 ரன்கள் எடுத்து 9 விக்கெட் வித்தியாசத்தில் அபார வெற்றி பெற்றது. அஸ்வின் ஹெப்பர் 99 ரன் எடுத்து ஆட்டம் இழந்தார். ஸ்ரீகர் பரத் 106 ரன்னும், கேப்டன் ஹனுமா விஹாரி 39 ரன்னும் எடுத்து ஆட்டம் இழக்காமல் இருந்தனர். 5-வது ஆட்டத்தில் ஆடிய ஆந்திரா அணி 5-வது வெற்றியை தனதாக்கியது. குஜராத் சந்தித்த 3-வது தோல்வி இதுவாகும்.

எஸ்.எஸ்.என். கல்லூரி மைதானத்தில் நடந்த லீக் ஆட்டத்தில் மும்பை அணி, கோவாவை எதிர்கொண்டது. முதலில் ஆடிய கோவா அணி 50 ஓவர்களில் 8 விக்கெட் இழப்புக்கு 266 ரன்கள் எடுத்தது. அஸ்னோட்கர், பிரபுதேசாய் தலா 56 ரன்கள் எடுத்தனர். இதைத்தொடர்ந்து ஆடிய மும்பை அணி 46.3 ஓவர்களில் 6 விக்கெட் இழப்புக்கு 267 ரன்கள் எடுத்து 4 விக்கெட் வித்தியாசத்தில் வெற்றி கண்டது. அதிகபட்சமாக சூர்யகுமார் யாதவ் 71 ரன்னும், ஆதித்ய தாரே 59 ரன்னும், பிரித்வி ஷா 53 ரன்னும் எடுத்தனர். மும்பை அணி பெற்ற 4-வது வெற்றி இதுவாகும். கோவா அணி சந்தித்த 3-வது தோல்வி இது.

சேப்பாக்கம் மைதானத்தில் நடந்த இன்னொரு ஆட்டத்தில் ராஜஸ்தான்-மத்தியபிரதேச அணிகள் சந்தித்தன. முதலில் பேட்டிங் செய்த மத்தியபிரதேச அணி 50 ஓவர்களில் 9 விக்கெட் இழப்புக்கு 241 ரன்கள் எடுத்தது. பின்னர் ஆடிய ராஜஸ்தான் அணி 47.2 ஓவர்களில் 3 விக்கெட் இழப்புக்கு 245 ரன்கள் எடுத்து 7 விக்கெட் வித்தியாசத்தில் வெற்றி பெற்றது. ஆதித்ய கார்வால் 108 ரன்கள் சேர்த்து ஆட்டம் இழந்தார். ராஜஸ்தான் அணி பெற்ற 2-வது வெற்றி இதுவாகும். மத்தியபிரதேச அணிக்கு இது 3-வது தோல்வியாகும்.