Templates by BIGtheme NET
ipl-Cricket-qualifying-round-clash-today-in-Mumbai

ஐ.பி.எல். கிரிக்கெட்: தகுதி சுற்றில் மும்பை-கொல்கத்தா இன்று மோதல்

பெங்களூரு :

10-வது ஐ.பி.எல். கிரிக்கெட் திருவிழாவில் இன்னும் 2 ஆட்டங்களே எஞ்சி உள்ளன. ரைசிங் புனே சூப்பர் ஜெயன்ட் அணி ஏற்கனவே இறுதிப்போட்டிக்கு முன்னேறி விட்ட நிலையில், மற்றொரு அணி எது என்பதை நிர்ணயிக்கும் 2-வது தகுதி சுற்று போட்டி பெங்களூரு சின்னசாமி ஸ்டேடியத்தில் இன்றிரவு அரங்கேறுகிறது. இதில் முன்னாள் சாம்பியன்கள் மும்பை இந்தியன்சும், கொல்கத்தா நைட் ரைடர்சும் கோதாவில் இறங்குகின்றன.

இரண்டு முறை சாம்பியனான மும்பை அணி முதலாவது தகுதி சுற்றில் 20 ரன்கள் வித்தியாசத்தில் புனேயிடம் தோற்றது. இருப்பினும் புள்ளி பட்டியலில் முதலிடத்தை பிடித்ததால் இன்னொரு வாய்ப்பு கிட்டியிருக்கிறது.

பேட்டிங் மற்றும் பந்து வீச்சில் பலம் வாய்ந்த மும்பை அணி ஒருங்கிணைந்த ஆட்டத்தை வெளிப்படுத்தும்பட்சத்தில் அபாயகரமான அணியாக உருவெடுத்து விடும் என்பதில் துளியும் சந்தேகமில்லை. புனேவுக்கு எதிரான ஆட்டத்தின் போது செய்த தவறுகளை திருத்திக்கொண்டு பரிகாரம் தேட முயற்சிப்பார்கள்.

நடப்பு தொடரில் லீக் சுற்றில் கொல்கத்தாவை சந்தித்த இரண்டு ஆட்டங்களிலும் மும்பை அணியே (9 ரன் மற்றும் 4 விக்கெட் வித்தியாசங்களில்) வெற்றி பெற்றிருந்தது. இதில் கொல்கத்தாவுக்கு எதிராக வான்கடே ஸ்டேடியத்தில் நடந்த ஆட்டத்தில் 24 பந்துகளில் 60 ரன்கள் தேவைப்பட்ட போது ஹர்திக் பாண்ட்யாவின் (11 பந்தில் 29 ரன்) மாயாஜால பேட்டிங்கால் மும்பை அணி ஒரு பந்து மீதம் வைத்து வாகை சூடியது ரசிகர்களுக்கு மறக்க முடியாத அனுபவமாக அமைந்தது. இத்தகைய வெற்றிகள் மும்பை அணிக்கு மனரீதியாக கூடுதல் நம்பிக்கையை அளிக்கும்.

கவுதம் கம்பீர் தலைமையிலான கொல்கத்தா அணி ஒரு கட்டத்தில் புள்ளி பட்டியலில் முதலிடத்தை பிடிப்பது போல் சென்றது. ஆனால் கடைசி 5 லீக்கில் 4-ல் மண்ணை கவ்வியதால் ‘பிளே-ஆப்’ சுற்றை எட்டுவதே பெரும்பாடாகி விட்டது.

மழையால் பாதிக்கப்பட்ட வெளியேற்றுதல் சுற்றில் ஐதராபாத்தை 7 விக்கெட் வித்தியாசத்தில் சாய்த்த கொல்கத்தா அணி, 3-வது முறையாக இறுதி சுற்றை எட்டும் முனைப்புடன் ஆயத்தமாகி வருகிறது.

கொல்கத்தா அணியில் பேட்டிங்கில் கேப்டன் கவுதம் கம்பீரும் (4 அரைசதத்துடன் 486 ரன்), பந்து வீச்சில் வேகப்பந்து வீச்சாளர் நாதன் கவுல்டர்-நிலேவும் (7 ஆட்டத்தில் 14 விக்கெட்) முதுகெலும்பாக திகழ்கிறார்கள். இதில் கவுல்டர்-நிலே இந்த சீசனில் 4 ஆட்டத்தில் தலா 3 விக்கெட் வீதம் கைப்பற்றி உள்ளார். இந்த ஆண்டில் எந்த பவுலரும் செய்யாத ஒரு சாதனை இதுவாகும். யூசுப் பதான், கிறிஸ் லின், ராபின் உத்தப்பா, சுனில் நரின், சூர்யகுமார் யாதவ் ஆகியோரும் கலக்கும் பட்சத்தில் கொல்கத்தா அணியின் ‘வீறுநடை’யை எதிரணி தடுப்பது கடினமாகி விடும். விலா பகுதியில் காயமடைந்த கொல்கத்தா பேட்ஸ்மேன் மனிஷ் பாண்டே இந்த ஆட்டத்திலும் விளையாட வாய்ப்பில்லை.

ஐ.பி.எல். வரலாற்றில் கொல்கத்தா அணி, ஒரு அணிக்கு எதிராக அதிகமான தோல்விகளை சந்தித்து இருக்கிறது என்றால் அது மும்பைக்கு எதிராகத்தான். அந்த அணிக்கு எதிராக இதுவரை 20 ஆட்டங்களில் விளையாடி அதில் 5-ல் மட்டுமே வெற்றி பெற்றுள்ளது. 15 ஆட்டங்களில் தோல்வி கண்டுள்ளது. இதில் இந்த ஆண்டில் இரண்டு ஆட்டங்களில் வீழ்ந்ததும் அடங்கும்.

முந்தைய தோல்விகளுக்கு பழிதீர்க்க கொல்கத்தா அணிக்கு சரியான சந்தர்ப்பம் கனிந்துள்ளது. அதை பயன்படுத்திக்கொள்வார்களா? அல்லது மும்பை அணியின் ‘ராஜ்ஜியம்’ தொடருமா? என்பதை பொறுத்திருந்து கவனிப்போம்.

பொதுவாக பெங்களூரு மைதானத்தில் பேட்ஸ்மேன்கள் ரன் மழை பொழிவார்கள். ஆனால் இந்த சீசனில் ஆடுகளத்தன்மை மெதுவாக இருப்பதால் பந்து வீச்சாளர்களுக்கு கைகொடுக்கிறது. 161 ரன்களே இங்கு இந்த முறை எடுக்கப்பட்ட அதிகபட்ச ஸ்கோராகும். இன்றைய ஆட்டத்திலும் பந்து வீச்சின் தாக்கம் கணிசமாக இருக்கும் என்று எதிர்பார்க்கப்படுகிறது.

வானிலையை பொறுத்தமட்டில் வானம் கொஞ்சம் மேகமூட்டத்துடன் காணப்படும். மழை பெய்வதற்கு 20 சதவீதம் வாய்ப்பு இருப்பதாக அங்குள்ள வானிலை ஆய்வு மையத் தகவல்கள் தெரிவிக்கின்றன.

போட்டிக்கான இரு அணிகளின் உத்தேச பட்டியல் வருமாறு:-

மும்பை: லென்டில் சிமோன்ஸ், பார்த்தீவ் பட்டேல், ரோகித் சர்மா (கேப்டன்), அம்பத்தி ராயுடு அல்லது நிதிஷ் ராணா, பொல்லார்ட், ஹர்திக் பாண்ட்யா, குணால் பாண்ட்யா, மெக்லெனஹான், ஹர்பஜன்சிங் அல்லது கரண் ஷர்மா, பும்ரா, மலிங்கா.

கொல்கத்தா: ராபின் உத்தப்பா, கிறிஸ் லின், யூசுப் பதான், கவுதம் கம்பீர் (கேப்டன்), இஷாங் ஜக்கி, சூர்யகுமார் யாதவ், சுனில் நரின், பியுஷ் சாவ்லா அல்லது குல்தீப் யாதவ், உமேஷ் யாதவ், நாதன் கவுல்டர்-நிலே, டிரென்ட் பவுல்ட்.

Leave a Reply

Your email address will not be published. Required fields are marked *

*